İsveçdə illüstratorlar onların öz əsərləri əsasında öyrədilmiş generativ süni intellekt texnologiyalarının yayılması səbəbindən getdikcə daha çox işsiz qalırlar.
AZƏRTAC xəbər verir ki, AI texnologiyaları müəlliflərin razılığı və kompensasiyası olmadan müəllif hüquqları ilə qorunan materiallar da daxil olmaqla, internetdən böyük həcmdə şəkillərdən istifadə edir.
On beşdən çox uşaq kitabının müəllifi, illüstrator və yazıçı Hanna Albrektson bildirib ki, son iki ildə sifarişlərin sayı kəskin şəkildə azalıb. İlk növbədə, jurnallar, reklam və qablaşdırma üçün kommersiya layihələri yoxa çıxıb. Onun sözlərinə görə, şirkətlər şəkillər yaratmaq üçün süni intellektdən getdikcə daha çox istifadə edərək, rəssamları yalnız son mərhələlərdə cəlb edirlər.
“Biz niyə süni intellektə uyğunlaşmalıyıq? Süni intellekt bizə uyğunlaşmalıdır. Şəkillər asanlıqla yaradıla bildikdə əl əməyinin dəyəri azalır. Bu, iki paralel dünyanın – “fast food” və evdə bişirilən yeməklər kimi, “insan” dünyasının və “süni intellekt” dünyasının yaranmasına gətirib çıxarır”, – deyə H.Albrektson vurğulayır.
İsveç İllüstratorlar İttifaqının apardığı sorğuya görə, üzvlərinin 42 faizi artıq süni intellekt səbəbindən işlərini və ya gəlirlərini itirib, halbuki iki il əvvəl bu göstərici 30 faiz təşkil edirdi. İttifaqın rəhbərliyi bildirib ki, süni intellekt sənayeni kökündən dəyişir, qiymətlərə təzyiqi artırır və müəllif hüquqlarının pozulması riskini artırır. O, süni intellekt təlimi üçün şəkillərin lisenziyalaşdırılması və yaradılan məzmunun məcburi etiketlənməsi də daxil olmaqla qanunvericilikdə dəyişikliklər edilməsinə çağırır.
Komiks rəssamları da ciddi narahatlıqlarını ifadə edirlər. Onların sözlərinə görə, süni intellekt texnologiyaları başqalarının əsərlərinin oğurlanmasına əsaslanır və artıq getdikcə daha da qeyri-sabit olan əmək bazarına təsir edir. Onlar xəbərdarlıq edirlər ki, gələcəkdə incəsənətdəki unikallıq yox ola bilər, gənc rəssamlar isə alqoritmlərin təsiri olmadan öyrənmək və inkişaf etmək imkanından məhrum olacaqlar.
