Bakı Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Xəlil Nəbiyevin (adı, soyadı şərtidir) cinayət işi üzrə məhkəmə iclası keçirilib.
Pravda.az-ın əldə etdiyi məlumata görə, hakim Elnur Nuriyevin sədrliyi ilə keçirilən prosesdə hökm oxunub.
Məhkəmənin hökmü ilə ona şərti cəza verilib.
İstintaq materiallarına əsasən, hadisə 2025-ci ildə Bakı şəhərinin Xəzər rayonu, Binə qəsəbəsi ərazisində baş verib.
Belə ki, 2010-cu il təvəllüdlü, yetkinlik yaşına çatmayan Xəlil Nəbiyev qəsəbə ərazisində yerləşən hasarlanmış boş sahədə 2009-cu il təvəllüdlü, zərərçəkmiş Hacı Qurbanovla (adı, soyadı şərtidir) mübahisə edib. Mübahisəyə səbəb kimi zərərçəkmiş şəxsin təqsirləndirilən şəxsə tanışı “Xəyalə” (şərti) adlı şəxsin ünvanına nalayiq ifadələr işlətməsi ilə bağlı irad bildirməsi göstərilir. Bu zaman Hacı onun yaxasından tutaraq mübahisəni daha da kəskinləşdirib.
İstintaqla müəyyən edilib ki, Xəlil yaranmış vəziyyətdən narazı qalaraq qarşı tərəfi cəzalandırmaq niyyəti ilə əvvəlcədən yaşadığı evdən götürdüyü suvenir bıçağını üzərində gizlədib hadisə yerinə gətirib. Mübahisə zamanı o, əsəbi halda qəfil şəkildə Hacıya bir dəfə zərbə endirib.
Məhkəmə baxışı zamanı yetkinlik yaşına çatmayan Xəlil Nəbiyev qanuni nümayəndəsi və müdafiəçisinin iştirakı ilə dindirilərək, ona elan olunmuş ittiham üzrə özünü təqsirli bilib. O, ifadəsində deyib ki, zərərçəkmiş şəxsi əvvəldən – eyni məktəbdə təhsil aldıqları dövrdən tanıyıb.
Onun sözlərinə görə, hadisə günü Hacı onunla telefon əlaqəsi saxlayaraq görüşmək istədiyini söyləyib. Daha sonra onlar Binə qəsəbəsində görüşüblər. Təqsirləndirilən şəxs qeyd edib ki, ehtiyat məqsədilə evdən çıxarkən bıçağı özü ilə götürüb və bunu mümkün təhlükədən qorunmaq üçün etdiyini düşünüb.
Hadisə yerində tərəflər hasarlanmış boş sahəyə keçərək təkbətək danışmağa başlayıblar. Bu zaman zərərçəkmiş şəxs ona tanışı barədə danışmamağı tələb edib. Xəlil isə belə bir halın olmadığını bildirib. O deyib ki, Hacı yaxasından tutduğuna görə, özünü müdafiə etmək məqsədilə belində olan bıçaqla bir dəfə zərbə vurub.
Bildirilir ki, hadisə zamanı ətrafda olan digər şəxslər mübahisənin baş verdiyi sahənin kənarında olduqları üçün birbaşa hadisəni görməyiblər.
Məhkəmə iclasında verilən əlavə suallara cavab olaraq təqsirləndirilən şəxs bıçağı götürməkdə əsas məqsədinin özünü qorumaq olduğunu vurğulayıb və hadisənin əvvəlcədən planlaşdırılmadığını qeyd edib.
İş üzrə dövlət ittihamçısının, zərərçəkmiş şəxsin, təqsirləndirilən şəxsin və onun müdafiəçisinin mövqeləri dinlənilib, həmçinin təqdim olunmuş sübutlar hərtərəfli tədqiq edilib. Məhkəmə araşdırmaların nəticəsində belə qənaətə gəlib ki, təqsirləndirilən şəxsin əməli Cinayət Məcəlləsinin 126.1-ci maddəsi ilə – qəsdən sağlamlığa ağır zərər vurma kimi düzgün tövsif olunub.
Qərara əsasən, yetkinlik yaşına çatmayan Xəlilin təqsiri onun etirafedici ifadəsi ilə yanaşı, iş üzrə toplanmış digər sübutlarla da tam təsdiq edilib.
Kamal Məmmədov
