İran-Pakistan sərhədində yanacaq qaçaqmalçılığı ilə bağlı genişmiqyaslı hərəkətlilik qeydə alınıb.
Bizim.Media xəbər verir ki, bu barədə İranın Khabar Online nəşri məlumat yayıb.
Məlumata görə, sosial şəbəkələrdə yayılan görüntülərin İran-Pakistan sərhədinə aid olduğu bildirilir. Kadrlarda İran yanacağının Pakistana doğru aparıldığı böyük karvanın hərəkət etdiyi görünür.
İddialara əsasən, hadisə sərhədyanı Pirkor şəhəri yaxınlığında qeydə alınıb. Minlərlə insanın yanacağı İran ərazisindən Pakistan istiqamətinə daşıdığı bildirilir.
Qeyd olunur ki, əvvəllər İran İslam İnqilabı Keşikçiləri Korpusu bu cür qaçaqmalçılıq sxemlərinin qarşısını daha sərt şəkildə alırdı. Lakin mənbələrin iddiasına görə, son vaxtlar sərhəd nəzarəti xeyli zəifləyib.
İran mediası yazır ki, mümkün səbəblərdən biri ölkədə neft anbarlarının dolmasıdır. Bildirilir ki, yanacağın qeyri-qanuni yollarla ölkədən çıxarılması artıq ehtiyatların qismən boşaldılmasına şərait yaradır.
Khabar Online isə yayılan görüntülərin “İrandan Pakistana doğru hərəkət edən böyük yanacaq qaçaqmalçılığı karvanına aid olduğu”nun deyildiyini bildirib.
Bizim.Media
