Tanınmış pediatr Markos Matsuka sağlam yuxu və düzgün həzm üçün axşam yeməyinin vaxtının həlledici rol oynadığını bildirib.
Redaktor.az "ABC" nəşrinə istinadən xəbər verir.
Ekspertin sözlərinə görə, orqanizm gecə istirahətinə hazırlaşmağa başlamazdan əvvəl qida qəbulu yekunlaşmalıdır. Matsuka ideal şam yeməyi vaxtının 20:00 ilə 20:30 arası olduğunu vurğulayıb. O qeyd edib ki, bu saatdan sonra yeyilən yeməklər həzm problemlərinə və yuxusuzluğa səbəb ola bilər.
Həkim xüsusilə gec saatlarda yeyilən yeməklərin qaraciyərin funksiyasına ağır zərbə vurduğunu deyib: "Qaraciyər immun sistemini formalaşdıran qırmızı qan hüceyrələrinin yaranması üçün dəmir və B12 vitaminini emal edir. Qaraciyər hüceyrələri saniyədə 2600 kimyəvi reaksiya həyata keçirir. Əgər siz gecə vaxtı bağırsaqdan gələn tonlarla qida molekulu ilə ona əlavə yük versəniz, o, öz əsas funksiyasını yerinə yetirə bilməyəcək".
Digər tərəfdən, dietoloq Elizabet Mahan da yuxu keyfiyyətini artırmaq üçün qidalanma tövsiyələrini paylaşıb. Mahanın fikrincə, axşam menyusunda karbohidratlarla zəngin qidaların olması daha tez yuxuya getməyə kömək edir.
Xədicə BAXIŞLI
