İrəvan eyni vaxtda Avropa ilə yaxınlaşma və Moskva ilə strateji əlaqələri qorumağa çalışır...
Poliqon xəbər verir ki, Almaniyanın “Deutsche Welle” (DW) nəşrinin məlumatına görə, Ermənistan hazırda Rusiya ilə Avropa İttifaqı (Aİ) arasında mürəkkəb və həssas geosiyasi balans siyasəti aparır. İrəvanda keçirilən Avropa Siyasi Birliyinin ilk toplantısı və Ermənistan–Aİ sammiti ölkənin Qərblə yaxınlaşma istiqamətində mühüm siqnal kimi qiymətləndirilir.
Məlumata əsasən, bu sammit çərçivəsində tərəflər “bağlantı üzrə tərəfdaşlıq” proqramına start veriblər. Proqram nəqliyyat, enerji və rəqəmsallaşma sahələrində əməkdaşlığın genişləndirilməsini nəzərdə tutur. Ermənistan hökuməti başçısı Nikol Paşinyanın ölkəni Qərbə yaxınlaşdırmaq siyasəti apardığı, lakin eyni zamanda Rusiya ilə mövcud iqtisadi və təhlükəsizlik əlaqələrini tam kəsmədiyi qeyd olunur.
DW yazır ki, İrəvan paralel olaraq Azərbaycan və Türkiyə ilə münasibətlərin normallaşdırılmasına çalışır və Avropadakı tərəfdaş şəbəkəsini genişləndirməyə üstünlük verir. Bu çoxvektorlu siyasət Ermənistanın xarici siyasət kursunun əsas istiqamətlərindən biri kimi qiymətləndirilir.
Eyni zamanda bildirilir ki, 7 iyun 2026-cı ildə keçiriləcək parlament seçkiləri ərəfəsində Ermənistanda kiberhücumların və dezinformasiya kampaniyalarının artdığı müşahidə olunur. Bu fəaliyyətlərdə Rusiyadan qaynaqlanan təsir elementlərinin olduğu iddia edilir. Avropa İttifaqı isə bu müdaxilələrin qarşısının alınması üçün xüsusi mütəxəssislər göndərib.
Moskvanın İrəvan üzərində siyasi təzyiqi artırdığı və Ermənistanın Avropa inteqrasiyası perspektivlərini sual altına aldığı da qeyd olunur. Bununla belə, Aİ-yə üzvlük məsələsinin hələ uzaq perspektiv olduğu, rəsmi müraciətin mövcud olmadığı və prosesin onilliklər çəkə biləcəyi vurğulanır.
Analitiklərin fikrincə, Ermənistan cəmiyyətində Avropaya inteqrasiya meyilləri artsa da, Rusiya ilə münasibətlərin tam kəsilməsi real görünmür. Hökumət isə demokratik və institusional islahatların sürətləndirilməsi öhdəliyini üzərinə götürüb.
Müşahidəçilər hesab edirlər ki, Ermənistanın hazırkı xarici siyasət kursu regionda geosiyasi rəqabətin artdığı bir dövrdə həm risklər, həm də yeni diplomatik imkanlar yaradır.
Poliqon.info
