Son dövrlərdə Yaxın Şərqdə baş verən hadisələr göstərir ki, tərəflər arasında qarşıdurma aktiv hərbi mərhələdən daha çox informasiya və təbliğat müstəvisinə keçib.
Politoloq Fikrət Sadıqov News365.az-a açıqlamasında bölgədəki son vəziyyəti və mümkün iqtisadi təsirləri şərh edib.
Politoloqun sözlərinə görə, hazırda tərəflər bir-birinə qarşı daha çox informasiya hücumları həyata keçirir, qarşılıqlı ittihamlar səsləndirilir və müxtəlif bəyanatlar verilir. Bu prosesdə fərqli mənbələr və xüsusilə xarici müşahidəçilər arasında ziddiyyətli fikirlər mövcuddur.
Sadıqov bildirib ki, bəzi məlumatlara görə ABŞ gəmilərinə zərbələr endirildiyi iddia olunur, digər tərəfdən isə İran-ın hədəfə alındığı qeyd edilir. Bu ziddiyyətli informasiyalar fonunda Hormuz boğazı əsas gərginlik nöqtəsinə çevrilib.
Onun sözlərinə görə, bu məsələ həm ABŞ, həm də İran üçün ciddi narahatlıq doğurur. Hər iki tərəf optimistik açıqlamalar versə də, reallıqda vəziyyət kifayət qədər həssasdır.
Politoloq əlavə edib ki, Donald Trump tərəfindən səsləndirilən iqtisadi təsirlərlə bağlı fikirlər müəyyən qədər əsaslı ola bilər. O qeyd edib ki, ABŞ kimi böyük iqtisadiyyata malik ölkə bu cür təzyiqlərə daha davamlıdır.
Bununla belə, Sadıqov vurğulayıb ki, Hormuz boğazının bağlanması və ya blokadaya alınması digər ölkələrin maraqlarına ciddi zərbə vurur. Xüsusilə enerji resurslarından – neft və qazdan asılı olan dövlətlər üçün bu vəziyyət iqtisadi baxımdan mənfi nəticələrə səbəb ola bilər.
Politoloqun fikrincə, bu amillər qlobal iqtisadi sabitlik üçün əlavə risklər yaradır və regiondakı gərginliyin nəticələri daha geniş coğrafiyada hiss oluna bilər.
