Hücum nəticəsində ekipaj üzvləri yaralanıb, gəmi isə ciddi ziyan görüb...
Poliqon xəbər verir ki, Fransanın CMA CGM şirkəti məlumat yayıb. Şirkət bəyan edib ki, ona məxsus yük gəmilərindən biri çərşənbə axşamı Hörmüz boğazı ərazisində atəşə tutulub. Hadisə nəticəsində gəminin bəzi ekipaj üzvləri yaralanıb, həmçinin gəminin özünə də zərər dəyib.
Şirkətin açıqlamasında bildirilir ki, yaralanan ekipaj üzvləri dərhal təxliyə olunub və onlara zəruri tibbi yardım göstərilir. “Zərər çəkmiş ekipaj üzvləri evakuasiya edilib və onlara lazımi tibbi xidmət göstərilir. CMA CGM vəziyyəti diqqətlə izləyir və ekipaja hərtərəfli dəstəyini davam etdirir”, deyə şirkətin rəsmi bəyanatında qeyd olunub.
Hadisənin hansı qüvvələr tərəfindən həyata keçirildiyi barədə hələlik rəsmi məlumat verilməyib. Bununla belə, Hörmüz boğazı son dövrlərdə regionda artan hərbi və geosiyasi gərginlik fonunda beynəlxalq nəqliyyat və enerji marşrutları üçün yüksək riskli zonaya çevrilib. Dünyada daşınan neftin əhəmiyyətli hissəsinin bu boğazdan keçməsi səbəbindən burada baş verən hər hansı insident qlobal bazarlara da təsir göstərir.
Ekspertlər qeyd edirlər ki, bu cür hücumlar beynəlxalq gəmiçilik şirkətlərini təhlükəsizlik tədbirlərini gücləndirməyə məcbur edir. Eyni zamanda, regionda fəaliyyət göstərən donanmalar və beynəlxalq koalisiyalar strateji su yollarında təhlükəsizliyin təmin olunması üçün patrul fəaliyyətlərini artırır.
Poliqon.info
