Tehran liman və dəniz infrastrukturlarının tam fəaliyyət göstərdiyini bildirir...
Poliqon xəbər verir ki, İranın Limanlar və Dəniz Nəqliyyatı Təşkilatı Hörmüz boğazı və regionun digər sularında hərəkət edən kommersiya gəmilərinə xidmət göstərməyə tam hazır olduqlarını bəyan edib. Təşkilatın açıqlamasında qeyd olunub ki, İran limanları dəniz nəqliyyatı üçün texniki, logistika və tibbi dəstək təqdim etmək imkanına malikdir.
İRNA dövlət agentliyinin yaydığı məlumata görə, rəsmi Tehran ölkənin bütün əsas limanlarının fasiləsiz fəaliyyət göstərdiyini və beynəlxalq gəmiçilik marşrutlarında təhlükəsizlik və xidmət təminatının davam etdirildiyini vurğulayıb.
Bəyanat ABŞ Prezidenti Donald Trampın “Project Freedom” adlı hərbi əməliyyatı dayandırdığını açıqlamasından sonra verilib. Həmin əməliyyat Hörmüz boğazında beynəlxalq gəmiçiliyin təhlükəsizliyini təmin etmək məqsədi daşıyırdı. Tramp qərarını İranla aparılan danışıqlarda əldə olunan irəliləyişlə əlaqələndirib.
Analitiklər hesab edirlər ki, İranın bu addımı regionda gərginliyin azaldılması və beynəlxalq ticarət marşrutlarının açıq saxlanılması istiqamətində siyasi mesaj xarakteri daşıyır. Hörmüz boğazı dünya neft tədarükünün mühüm hissəsinin keçdiyi strateji marşrut hesab olunduğundan, burada təhlükəsizlik məsələsi qlobal enerji bazarları üçün xüsusi əhəmiyyət kəsb edir.
Müşahidəçilər qeyd edirlər ki, Tehran və Vaşinqton arasında diplomatik təmasların davam etməsi regionda hərbi eskalasiya risklərini müəyyən qədər azalda bilər.
Poliqon.info
