ain.az, Bizimyol portalından verilən məlumatlara əsaslanaraq xəbər verir.
Ukraynanın danışıqların aparılmasına rəhbərlik edən Rustem Umerov bu həftə ABŞ-ın xüsusi nümayəndəsi Stiv Vitkoffla görüşmək üçün Mayamiyə yollanacaq.
Bizimyol.info xəbər verir ki, bu barədə "Bloomberg" agentliyi mənbələrə istinadən məlumat yayıb.
Nəşr qeyd edir ki, son həftələrdə Rusiya-Ukrayna sülh danışıqları ABŞ, İsrail və İran arasındakı gərginlik fonunda diqqət mərkəzindən kənarda qalıb.
Eyni zamanda, Rusiya prezidenti Vladimir Putinin Ukraynanın Donetsk vilayətinin bir hissəsinə dair ərazi iddialarından geri çəkilməyə hazır olduğuna dair heç bir əlamət görünmür.
Agentlik yazır ki, müharibənin dayandırılması ilə bağlı əvvəlki danışıqların çoxsaylı raundları müəyyən irəliləyişlərə səbəb olsa da, Donbasın statusu və Ukraynanın müttəfiqlərindən alacağı təhlükəsizlik təminatlarının detalları əsas mübahisə mövzusu olaraq qalır.
Moskva Ukrayna ordusunun Donetsk vilayətindən çıxarılmasını tələb edir. Kiyev isə nəzarətində olan ərazilərdən imtina etməyəcəyini və işğal olunmuş torpaqları Rusiya ərazisi kimi tanımayacağını bildirir.
"Bloomberg" mənbələri mümkün görüşün gündəliyi barədə əlavə məlumat verməkdən imtina ediblər.
Məqalədə qeyd olunur ki, Kiyev Vitkoffun digər xüsusi nümayəndə Cared Kuşnerlə birlikdə Ukraynaya səfər edəcəyinə ümid edirdi, lakin bu məsələ hələ də qeyri-müəyyən olaraq qalır. Ukrayna prezidenti Vladimir Zelenski "Bloomberg News"a müsahibəsində bildirib ki, hər iki nümayəndə Ukraynaya dəvət olunub, lakin səfəri hələ təsdiqləməyiblər.
Bu arada ABŞ-ın keçmiş dövlət katibi Entoni Blinken son aylarda Ukraynanın döyüş meydanında daha uğurlu nəticələr əldə etdiyini, Rusiya ordusunun isə ciddi itkilər verdiyini və bəzi mövqelərini itirdiyini bildirib.
Moskva isə 9 May ərəfəsində Ukraynaya qarşı zərbələr endirilə biləcəyi ilə bağlı xəbərdarlıq edib. Rusiya Xarici İşlər Nazirliyi bütün diplomatik missiyalara və beynəlxalq təşkilatların nümayəndəliklərinə mümkün eskalasiya barədə nota göndərib.
Bizimyol.info
Sonrakı hadisələr barədə daha çox məlumat almaq üçün ain.az saytını izləyin.
