Qlobal kənd təsərrüfatı proqramlarının dayanması Nepalda minlərlə kiçik fermerin həyatına mənfi təsir göstərib. ABŞ tərəfindən maliyyələşdirilən “Feed the Future” proqramının vaxtından əvvəl dayandırılması xüsusilə qadın fermerlərin gəlirlərini azaldıb.
QHT.az xarici mediaya istinadən bildirir ki, USAID-in həyata keçirdiyi və 2028-ci ilə qədər davam etməli olan 24,5 milyon dollarlıq proqramın dayandırılması 21 bölgədə təxminən 20 min fermeri çətin vəziyyətə salıb. Proqram çərçivəsində fermerlərə toxum, gübrə, suvarma texnologiyası və aqrar məsləhətlər verilirdi.
Bu dəstəyin dayanması ilə fermerlər yenidən baha qiymətli toxum və gübrə almağa məcbur qalıb, məhsuldarlıq azalıb və bazar əlaqələri zəifləyib. Bir çox ailələr isə gəlir çatışmazlığı səbəbindən üzvlərini xaricdə işləməyə göndərir.
Bu cür proqramların ləğvi kənd icmalarının ərzaq təhlükəsizliyini zəiflədir və onları iqlim və iqtisadi böhranlara qarşı daha həssas edir.
