Keçmiş ABŞ dövlət katibi Vaşinqtonun ayırdığı vəsaitin böyük hissəsinin ölkə daxilində qaldığını deyib...
Poliqon xəbər verir ki, ABŞ-nin keçmiş dövlət katibi Antony Blinken Avropa ölkələrinin Ukraynaya göstərdiyi dəstəyin miqyas baxımından ABŞ-ni üstələdiyini bildirib.
Onun sözlərinə görə, Vaşinqtonun Ukraynaya yardım adı altında ayırdığı vəsaitin əhəmiyyətli hissəsi əslində ABŞ iqtisadiyyatına geri qayıdıb. Blinken qeyd edib ki, bu pullar əsasən silah alışına və Amerika ordusunun ehtiyatlarının yenilənməsinə yönəldilib.
“ABŞ-nin Ukraynaya xərclədiyi pulların böyük hissəsi ölkənin özündə qalıb. Bu vəsait silahların alınmasına və ehtiyatların artırılmasına sərf olunub”, deyə keçmiş dövlət katibi vurğulayıb.
Blinkenin açıqlamaları Qərb ölkələrinin Ukraynaya hərbi və maliyyə yardımları ilə bağlı müzakirələrin davam etdiyi bir vaxtda səslənib. Son illərdə Avropa İttifaqı ölkələri və NATO üzvləri Kiyevə milyardlarla dollar həcmində hərbi texnika, hava hücumundan müdafiə sistemləri, sursat və iqtisadi yardım ayırıblar.
Ekspertlər hesab edirlər ki, ABŞ istehsalı olan silah və texnikaların böyük hissəsinin Ukraynaya göndərilməsi Amerika müdafiə sənayesinə də ciddi iqtisadi üstünlüklər qazandırıb. Bu proses eyni zamanda ABŞ hərbi-sənaye kompleksinin istehsal gücünün artırılmasına və yeni sifarişlərin formalaşmasına səbəb olub.
Blinkenin fikirləri Vaşinqtonun Ukraynaya yardımlarının yalnız geosiyasi deyil, həm də iqtisadi nəticələr doğurduğunu bir daha gündəmə gətirib.
Poliqon.info
