Beynəlxalq ICAN kampaniyasının yeni hesabatında dünyanın müxtəlif maliyyə qurumları tərəfindən nüvə silahları sənayesinə qoyulan investisiyaların artması barədə məlumat verilir...
Poliqon xəbər verir ki, bu barədə Forbes yazıb.
Hesabatda bildirilir ki, 300-dən çox maliyyə qurumu nüvə silahı istehsalı ilə əlaqəli şirkətlərə yatırımlarını artırıb. Bu göstərici əvvəlki dövrlə müqayisədə təxminən 15% çoxdur. Halbuki son illərdə bu sahəyə investisiyalarda tədricən azalma müşahidə olunurdu.
Materialda vurğulanır ki, nüvə silahının istehsalı, yerləşdirilməsi və texniki xidməti ətraf mühitə və insanların sağlamlığına ciddi zərər vurur. Xüsusilə radiasiya təsiri riskləri və nüvə fəaliyyəti nəticəsində yaranan uzunmüddətli ekoloji nəticələr qeyd olunur.
Bundan başqa, müəlliflər erkən xəbərdarlıq sistemlərindəki səhvlər və ya yanlış siqnallar səbəbindən nüvə silahının təsadüfi istifadəsi riskinə diqqət çəkirlər.
Nüvə çəkindirməsi tərəfdarları hesab edir ki, böyük dövlətlərin nüvə silahına sahib olması onlar arasında birbaşa müharibə ehtimalını azaldır. Lakin tənqidçilər bildirirlər ki, bu yanaşma nüvə sənayesinin ekoloji və humanitar nəticələrini nəzərə almır.
Hesabatda həmçinin müasir şəraitdə nüvə münaqişəsi riskinin artdığı barədə ekspert qiymətləndirmələrinə də yer verilib.
ICAN qeyd edir ki, nüvə sənayesində dünyanın müxtəlif ölkələrindən onlarla iri korporasiya və maliyyə strukturu iştirak edir. Onların arasında müdafiə şirkətləri və müvafiq proqramları maliyyələşdirən iri banklar da var.
Poliqon.info
