AFFA İntizam Komitəsi Azərbaycan Kubokunun yarımfinal mərhələsinin cavab oyunlarından sonra bir sıra sərt qərarlar qəbul edib.
90deqiqe.Az xəbər verir ki, ən ağır cəza “Sabah” – “Qarabağ” matçından sonra Ağdam təmsilçisinə tətbiq olunub.
“Zirə” – “Turan Tovuz” görüşündə qonaq komandanın 4 futbolçusunun sarı vərəqə alması klubun 700 manat cərimələnməsi ilə nəticələnib.
“Sabah” – “Qarabağ” qarşılaşmasında isə həm meydandakı, həm də tribunadakı hadisələr AFFA tərəfindən ciddi şəkildə qiymətləndirilib. “Sabah” 5 futbolçusunun sarı vərəqə almasına görə 700 manat cərimə olunub. Bundan əlavə, azarkeşlərin meydana kənar əşyalar atmasına görə klub 2000 manat, tribunadan kənar şəxsin meydana daxil olmasına görə 6500 manat, pirotexniki vasitələrdən istifadəyə görə isə 3000 manat ödəyəcək.
“Qarabağ”ın qapıçısı Mateuş Koxalski rəqibi aşkar qol imkanından məhrum etdiyi üçün birbaşa qırmızı vərəqə alıb. Polşalı qolkiper 1 oyunluq cəzalanıb, klub isə 1000 manat cərimələnib.
Matçdan sonra Ağdam təmsilçisinin futbolçusu Marko Yankoviç hakim qərarına etiraz etdiyi üçün ikinci sarı vərəqə ilə meydandan qovulub. AFFA onun daha sonra hakimə fiziki təzyiq göstərməyə cəhd etdiyini və hədə-qorxu gəldiyini açıqlayıb. Nəticədə monteneqrolu yarımmüdafiəçi 8 oyunluq дисквалификация olunub, klub isə 25 500 manat cərimə edilib.
Bundan başqa, “Qarabağ” azarkeşlərinin davranışına görə də əlavə sanksiyalar tətbiq olunub. Meydana kənar əşyaların atılmasına görə 2000 manat, pirotexniki vasitələrdən dəfələrlə istifadəyə görə 7000 manat, tribunadan kütləvi təhqiramiz ifadələrin səsləndirilməsinə görə isə 8000 manat cərimə kəsilib. Azarkeş sektorunda törədilən dağıntılar səbəbindən klub daha 5000 manat ödəyəcək. Həmçinin stadionda sındırılmış 70 oturacağın dəyəri də “Qarabağ” tərəfindən qarşılanacaq.
Oyundan sonra komandanın məşqçisi Hüseyn Seyidov hakimə fiziki təzyiq göstərməyə cəhd etdiyi və onu təhqir etdiyi üçün 6 oyunluq cəzalanıb. Klub bu epizoda görə əlavə 18 min manat cərimələnib.
“Qarabağ”ın əməkdaşı İlqar Şamilov da matçın rəsmi şəxsinə fiziki təzyiq göstərməyə cəhd etdiyi üçün 5 oyunluq дисквалификация olunub. Klub bu səbəbdən daha 8000 manat ödəyəcək.
