70-ci "Avroviziya" müsabiqəsinin rəsmi açılış mərasimi mayın 10-da, bazar axşamı Vyanada baş tutub. "Avroviziya-2026" iştirakçıları mərasimə 170 metr uzunluğunda olan firuzəyi xalçanın üstündən keçərək gəldilər. Xalça Avstriya paytaxtının Burqteatrından Ratuşaya qədər uzanırdı, burada isə artistləri Vyana Bələdiyyə Başçısı Mixael Ludviq və müsabiqənin təşkilatçıları salamladılar. Bu barədə Oxuməni.az “Deutsche Welle”yə istinadla xəbər verir.
Bu ilki "Avroviziya" üçün hazırlıqlar müsabiqə tarixində ən çətinlərdən biri idi. Beş ölkənin – Niderland, İrlandiya, İslandiya, İspaniya və Sloveniyanın – teleşirkətləri İsrailin iştirakına etiraz olaraq "Avroviziya"nı boykot etdiklərini elan etdilər.
Bununla belə, açılış mərasimi insidentsiz keçdi. İştirakçıların hər birinin ictimaiyyət qarşısına çıxışını azarkeşlər "Avroviziya" musiqisi sədaları altında fəxrlə smartfonlarını yuxarı qaldıraraq alqışladılar.
Açılış mərasimi müsabiqə zamanı bütün iştirakçıların bir araya gəldiyi yeganə tədbirdir. Onlardan bəziləri mayın 12-də və 14-də keçiriləcək ilk iki yarımfinalın nəticələrinə əsasən "Avroviziya"dan ayrılacaqlar. Mayın 16-da, şənbə günü Wiener Stadthalle səhnəsində keçiriləcək finalda tamaşaçılar bu ilki müsabiqəyə qeydiyyatdan keçmiş 35 iştirakçıdan 25-ni görəcəklər.
Bukmekerlərin məlumatına görə, finaldan bir həftə əvvəl müsabiqədə qalib gəlmək şansı ən yüksək olanlar skripkaçı Linda Lampenius və müğənni Peti Parkkonenadan ibarət Finlandiya dueti idi. Onların əsas rəqibləri isə Yunanıstan təmsilçisi Akylos, Danimarka təmsilçisi Søren Torpegaard Lund, Fransa təmsilçisi Monroe və Avstraliyadan olan Delta Goodrem hesab olunurdu.
Vyanada (Avstriya) keçirilən "Avroviziya-2026" beynəlxalq mahnı müsabiqəsində Azərbaycanı müğənni JIVA (Cəmilə Qəşəmova) "Just Go" mahnısı ilə təmsil edir. Mahnı ayrılıq mövzusuna həsr olunub, ifaçı isə artıq məşqlərini keçib və firuzəyi xalçadan keçib.
Xatırladaq ki, JIVA mayın 14-də keçiriləcək "Avroviziya 2026"nın ikinci yarımfinalında çıxış edəcək – müğənni səhnəyə 2-ci nömrə altında çıxacaq.
Almaz Həsənli
