Yer kürəsinin ən yüksək temperatur qeydə alınan 50 şəhərinin hamısı Hindistandadır.
Pravda.az xəbər verir ki, bu barədə dünya üzrə hava keyfiyyəti və iqlim göstəricilərini izləyən beynəlxalq platformaların aprel ayına olan hesabatında bildirilib.
Mütəxəssislər müasir tarixdə buna bənzər hadisənin yaşanmadığını qeyd edirlər.
Adətən ilin ən isti dövrü hesab olunmayan aprel ayında Hindistanda orta maksimum temperatur 44,7 dərəcəyə çatıb. Siyahının ilk pilləsində yer alan Uttar-Pradeş ştatının Banda şəhərində isə termometrlər 46,2 dərəcə göstərib. Bu göstərici həmin gün Yer üzündə ölçülən ən yüksək temperatur kimi tarixə düşüb.
İqlimşünaslar və tarixçilər bildirirlər ki, Hindistanın daxili bölgələrini əhatə edən bu ekstremal istilər aprel ayı üzrə yüzlərlə rekordun yenilənməsinə səbəb olub. Qlobal iqlim böhranının təsiri ilə ölkədə yay mövsümünün hər il daha erkən başladığı və daha qızmar keçdiyi vurğulanır. Ekspertlər xəbərdarlıq edirlər ki, 2050-ci ilə qədər Hindistanda temperatur hətta sağlam insanlar üçün belə “yaşamaq həddini” aşa bilər.
Xüsusilə yaşlılar, uşaqlar və açıq havada çalışan insanlar üçün ciddi təhlükə yaradan istilər ölkənin kənd təsərrüfatına və səhiyyə sisteminə də ziyan göstərir.
Temperaturun yüksəlməsi fonunda Hindistan bu il enerji böhranı ilə də üz-üzə qalıb. Yaxın Şərqdə davam edən müharibənin neft tədarükünə təsiri, soyutma tələbatının pik həddə çatdığı bir vaxtda ölkədə yanacaq çatışmazlığı riskini artırıb. Yaxın aylarla bağlı proqnozlar isə daha narahatedici qiymətləndirilir.
“El Nino” hava hadisəsinin təsiri nəticəsində musson yağışlarının normadan az olacağı gözlənilir. Mütəxəssislər bildirirlər ki, yüksək rütubətlə birlikdə hiss olunan temperatur mərkəzi və şərq ştatlarında 50-60 dərəcəyə qədər yüksələ bilər.
