“Qoç Ət” restoranında səhər yeməyi zamanı qeydə alınan hadisə narazılığa səbəb olub. Bildirilir ki, təqdim edilən pendirin içindən tük aşkar edilib. Məsələ ilə bağlı şikayət edən müştərilərə isə bunun “normal hal” olduğu deyilib.
Mövzu ilə bağlı Qida məsələləri üzrə baş mütəxəssis, Azərbaycan Mütəxəssislər Assosiasiyasının idarə heyətinin üzvü Ağa Salamov QHT.az-a açıqlama verib.
Ağa Salamov bildirib ki, Azərbaycan hüquqi dövlətdir və AQTA fəaliyyətini qanunvericiliyə uyğun həyata keçirir: "Azərbaycan hüquqi dövlətdir və Azərbaycan Respublikasının Qida Təhlükəsizliyi Agentliyi fəaliyyətini mövcud qanunvericiliyə uyğun şəkildə həyata keçirir. Agentliyə hansı obyektin necə yoxlanılmalı olduğunu izah etməyə ehtiyac yoxdur. Zəruri hallarda həm kiçik obyektlərdə, həm də 5 ulduzlu hotellərdə yoxlamalar aparılır, xəbərdarlıqlar edilir, cərimələr tətbiq olunur və digər tədbirlər görülür".
A.Salamovun sözlərinə görə, müzakirə olunan görüntüdə ənənəvi üsulla hazırlanan motal pendirindən söhbət gedir: "Müzakirə olunan görüntüdə isə söhbət motal pendirindən gedir. Motal pendiri Azərbaycan milli mətbəxinin ən tanınmış və özünəməxsus məhsullarından biridir. Bu pendir ənənəvi olaraq qoyun dərisində hazırlanır və onun spesifik xüsusiyyəti də məhz bundan qaynaqlanır. Məhsulu yaxından tanıyan insanlar yaxşı bilir ki, pendirin üzərində müəyyən tük qalıqlarının olması qeyri-adi hal sayılmır və klassik hazırlanma üsulunun nəticəsidir".
Mütəxəssis vurğulayıb ki, Xızı və Altıağac bölgələrinin motal pendiri xüsusi hazırlanma üsulu ilə seçilir: "Xüsusilə Xızı və Altıağac bölgələrində hazırlanan motal pendiri öz dadı və ənənəvi istehsal üsulu ilə seçilir. Bu pendirin fərqi ondadır ki, məhsul dərinin içində yetişir və həmin üsul onun həm dadını, həm də xarakterik xüsusiyyətlərini formalaşdırır".
Ağa Salamov qeyd edib ki, məhsullar qiymətləndirilərkən onların ənənəvi hazırlanma texnologiyası nəzərə alınmalıdır: "Şübhəsiz ki, gigiyena və qida təhlükəsizliyi məsələləri hər zaman vacibdir. Lakin hər hansı məhsulu qiymətləndirərkən onun hazırlanma texnologiyası və ənənəvi xüsusiyyətləri də nəzərə alınmalıdır. Burada söhbət adi bir məhsuldan deyil, milli mətbəximizin ənənəvi üsulla hazırlanan nümunələrindən birindən gedir".
A.Salamovun fikrincə, məsələyə balanslı və peşəkar yanaşmaq vacibdir: "Məsələnin digər tərəfi isə ondan ibarətdir ki, müzakirə olunan məkan Qoç Ət kimi tanınmış restorandır və burada əsasən kənd və orqanik məhsullara üstünlük verildiyi məlumdur. Belə hallarda mövzuya balanslı və peşəkar yanaşmaq xüsusilə vacibdir".
Mütəxəssis bildirib ki, yerli və ənənəvi məhsul təqdim edən sahibkarların hədəfə çevrilməsi doğru deyil: "Bu gün bazarda mənşəyi bəlli olmayan və süni tərkibli qidaların geniş yayıldığı bir dövrdə yerli və ənənəvi məhsullar təqdim edən sahibkarların hədəfə çevrilməsi doğru yanaşma hesab oluna bilməz. Təəssüf ki, bəzən qida sahəsi barədə kifayət qədər məlumatı olmayan şəxslər də məsələ ilə bağlı qəti hökm verməyə çalışırlar".
Ağa Salamovun sözlərinə görə, qida sahəsində səsləndirilən fikirlər əsaslandırılmış və peşəkar olmalıdır: "Əlbəttə, qida sahəsində tənqid və rəy bildirmək hər kəsin haqqıdır. Ancaq bunu peşəkar və əsaslandırılmış şəkildə etmək vacibdir. Əgər məhsulda həqiqətən təhlükə, çirklənmə və ya standart pozuntusu varsa, bu, mütəxəssislər tərəfindən əsaslı şəkildə izah edilməlidir. Əks halda, səsləndirilən fikirlər həm ictimaiyyətdə yanlış təsəvvür yaradır, həm də insanların və sahibkarların reputasiyasına zərər vurur".
Mütəxəssis vurğulayıb ki, dünyada müxtəlif hazırlanma texnologiyasına malik yüzlərlə pendir növü mövcuddur: "Unudulmamalıdır ki, dünyada yüzlərlə pendir növü mövcuddur və hər birinin özünəməxsus hazırlanma texnologiyası var. Məsələn, Emmental, Cheddar, Gouda və Blue cheese kimi pendirlər müxtəlif üsullarla hazırlanır. Xüsusilə blue cheese kiflənmiş formada istehsal olunur və məhz bu xüsusiyyətinə görə dünyanın ən qiymətli pendir növlərindən biri hesab edilir. Yəni hər hansı qida məhsulunu qiymətləndirərkən onun hazırlanma texnologiyasını və spesifik xüsusiyyətlərini bilmək vacibdir".
A.Salamov qeyd edib ki, motal pendirinin xüsusiyyətlərini sensasiya kimi təqdim etmək düzgün yanaşma deyil: "Nəticə etibarilə, motal pendirində müəyyən tük qalıqlarının olması onun ənənəvi hazırlanma üsulundan irəli gələn xüsusiyyətdir və bunu sensasiya kimi təqdim etmək düzgün yanaşma deyil. Əsas məsələ milli mətbəximizin, yerli məhsullarımızın və ənənəvi istehsal mədəniyyətimizin düzgün təqdim olunmasıdır. Xarici məhsulları təbliğ etməklə yanaşı, öz milli və yerli məhsullarımıza da dəyər verməyi bacarmalıyıq".
Fatimə Nəbiyeva
