Fransa Hörmüz boğazında gəmiçiliyin bərpası üçün danışıqların şərtlərini təmin etmək məqsədilə BMT-də təşəbbüs irəli sürmək niyyətindədir.
Musavat.com xəbər verir ki, bunu Fransa Prezidenti Emmanuel Makron "France 24" televiziyasına müsahibədə deyib: "Biz bütün blokadaları aradan qaldırmaqla və İranla tələbkar dialoq aparmaqla Hörmüz boğazının qeyd-şərtsiz və maneəsiz açılmasına nail olmalıyıq. Biz bir neçə digər ölkə ilə birlikdə BMT-də İranla münaqişənin həlli üçün tamamilə neytral və dinc çərçivə təklif edən bir təşəbbüs irəli sürməyi təklif etmişik. Və biz xüsusi bir missiyanın yaradılmasını təklif edirik ki, bunun üçün Birləşmiş Krallıqla birlikdə 50 ölkəni bir araya gətirdik".
Makron Hörmüz boğazının açılmasının "mütləq prioritet" olduğunu bildirərək, Fransanın digər fikir ayrılıqlarını həll etməzdən əvvəl bu məsələnin həllini dəstəklədiyini vurğulayıb. Bundan sonra o, İranla ABŞ arasında nüvə və raket proqramları üzrə dialoqun Aİ-nin 3 ölkəsi - Birləşmiş Krallıq, Almaniya və Fransanın iştirakı ilə bərpa edilməli olduğunu bildirib.
Qeyd edək ki, 7 mayda Fransa təyyarədaşıyan gəmisi "Şarl de Qoll" Qırmızı dənizə daxil olub. Yelisey Sarayı bu addımı Hörmüz boğazında təhlükəsizliyin təmin edilməsinə sadiqliyinin nümayişi adlandırıb.
Fransa prezident administrasiyasının sözçüsü Parisin həm ABŞ, həm də İrandan tələbləri olduğunu bildirib: “Tehran ABŞ-ın dəvəti ilə substantiv danışıqlara qoşulmağa razı olmalıdır, Vaşinqton isə Hörmüz boğazının blokadasını ləğv etməli və İranın danışıqlara hazır olmasına cavab verməlidir. Bu şərtlər yerinə yetirildikdən sonra dəniz koalisiyası boğazdan keçən gəmilərin təhlükəsizliyini təmin etmək üçün bölgədə aktivlər yerləşdirə biləcək".
Musavat.com
