Bakı, 14 may, AZƏRTAC
Qlobal Cənubda sürətli şəhər transformasiyası dövründə forumun ilk dəfə Cənubi Qafqazda keçirilməsi xüsusilə əhəmiyyətlidir. Bu tədbir beynəlxalq görüşdən daha artığıdır. Bu gün Qlobal Cənub insanlığın əsasən Afrikada, Asiyada, Latın Amerikasında və digər inkişaf etməkdə olan regionlardakı şəhərlərdə yaşayacağı bir dövrə qədəm qoyub.
AZƏRTAC xəbər verir ki, bu sözləri İsveçrənin Qlobal Su, Ətraf Mühit və Sağlamlıq İnstitutunun təsisçisi Nidal Salim “Bakı Şəhərsalma Həftəsi” çərçivəsində Qlobal Cənub QHT Platformasının ilk Baş Assambleyası çıxışı zamanı deyib.
"Biz imkanlar və inkişaf əldə edirik, lakin, eyni zamanda, su təhlükəsizliyi, antisanitariya, iqlim riskləri və artan bərabərsizliklə üzləşirik. Milyonlarla insan hələ də su problemi, iqlim dəyişməsi kimi problemlərlə üzləşir", - deyə o bildirib.
Nidal Salim davamlılığın yalnız infrastrukturla mümkün olmadığını, inklüziv idarəetmə, güclü institutlar və vətəndaş iştirakını tələb etdiyini diqqətə çatdırıb. "QHT-lər və icma təşkilatları bu baxımdan vacibdir. Dövlət siyasəti və özəl sektor investisiya və inkişaf təmin etsə də, vətəndaş cəmiyyəti etimad, icmalara yaxınlıq və qlobal məqsədləri yerli fəaliyyətə çevirmək bacarığı gətirir", - deyə İsveçrənin Qlobal Su, Ətraf Mühit və Sağlamlıq İnstitutunun təsisçisi qeyd edib.
