BAKI, 15 may. TELEQRAF
Boliviyanın paytaxtı La Paz şəhərində mədənçilərlə polis arasında şiddətli toqquşmalar baş verib.
Teleqraf xəbər verir ki, etirazçılar mərkəzi Murilyo meydanına daxil olmağa çalışarkən hüquq-mühafizə qüvvələri ilə qarşıdurma yaşanıb. Hadisə zamanı partlayış səsləri eşidilib, nümayişçilərin dinamitə bənzər partlayıcı maddələrdən istifadə etdiyi bildirilib.
Mədənçilər partlayıcı maddələrə və yanacağa çıxış imkanlarının artırılmasını, həmçinin müqavilələrə yenidən baxılmasını və mədən qanunvericiliyinin tətbiqini tələb edirlər.
Məlumata görə, ölkədə ABŞ dolları çatışmazlığı və daxili enerji istehsalının azalması fonunda iqtisadi və yanacaq böhranı dərinləşib. Bu səbəbdən fermerlər və müxtəlif həmkarlar ittifaqları da etirazlara qoşulub.
Bəzi nümayişçilər cəmi altı ay əvvəl vəzifəyə başlayan Prezident Rodriqo Pasın istefasını tələb ediblər.
Boliviya hökuməti isə etirazçılarla yanacaq subsidiyaları, sosial təminatlar və aqrar islahatlarla bağlı danışıqlar aparıldığını açıqlayıb.
Xəbərdə qeyd olunur ki, etirazlar çərçivəsində qurulan yol blokadaları ərzaq, tibbi ləvazimat və xəstəxanalar üçün oksigen çatışmazlığına səbəb olub. Magistral yollarda minlərlə yük maşınının hərəkətsiz qaldığı bildirilir.
Boliviyanın iqtisadiyyat naziri Xose Qabriel Espinosa hökumətin dialoqa açıq olduğunu bəyan edib.
Hakimiyyət nümayəndələri isə aksiyaların arxasında müxalifətin və ölkənin keçmiş prezidenti Evo Moralesin dayandığını iddia edirlər. Evo Morales isə sosial şəbəkədə etirazçılara dəstək verərək, yanacaq, ərzaq və inflyasiya problemləri həll olunmayana qədər aksiyaların dayanmayacağını bildirib.
