Gələcəkdə yüksək qan təzyiqindən qorunmaq və ya artıq hipertoniyadan əziyyət çəkən şəxslərin ağırlaşma riskini azaltmaq üçün xüsusi qidalanma rejiminə əməl etməsi tövsiyə olunur...
Poliqon Verywell Health nəşrinə istinadən xəbər verir ki, bəzi məhsulların istifadəsi minimuma endirilməli, hətta tamamilə dayandırılmalıdır.
Məqalənin müəllifi, tibb üzrə fəlsəfə doktoru Karen Şekelford yüksək təzyiq zamanı ən zərərli hesab edilən 9 məhsulu sadalayıb.
1. Duz
Ekspert bildirib ki, orta statistik insan gündə təxminən 3400 milliqram natrium qəbul edir ki, bu da tövsiyə olunan normadan xeyli çoxdur. Amerika Ürək Assosiasiyası gündə maksimum 1500 mq duz qəbulunu məsləhət görür və qeyd edir ki, gündəlik normanı heç olmasa 1000 mq azaltmaq belə qan təzyiqi və ürək sağlamlığına müsbət təsir göstərə bilər.
Duz istifadəsini azaltmaq üçün Karen Şekelford məhsulların üzərindəki etiketlərin diqqətlə oxunmasını tövsiyə edir.
2. Emal olunmuş qidalar
Məqalədə qeyd olunur ki, emal olunmuş məhsulların əksəriyyətində yüksək miqdarda duz olur və bu da qan təzyiqini artırır.
"Rasionunuzdakı duzun 75 faizindən çoxu qablaşdırılmış məhsullardan gələ bilər. Duz qəbulunu azaltmağın ən effektiv yolu bu məhsullardan uzaq durmaqdır", deyə həkim bildirib.
Ekspert xüsusilə fast food məhsullarından uzaq durmağı tövsiyə edib, çünki onların tərkibinə dadı gücləndirmək üçün çoxlu duz əlavə olunur.
3. Ət delikatesləri və bekon
Kolbasa, salyami, bekon və digər emal olunmuş ət məhsulları da yüksək natrium tərkibi ilə seçilir. Məsələn, bir porsiya "Genoa" salyamisində 910 mq natrium var, cəmi üç dilim hinduşka əti isə 1000 mq-dan çox natrium ehtiva edə bilər.
Nutrition Journal araşdırmasına istinad edən müəllif bildirib ki, daha sağlam seçim kimi qızardılmış mal əti, donuz filesi və konservantsız hazırlanmış toyuq əti seçilə bilər. Lakin bunların da az miqdarda qəbul edilməsi vacibdir.
Bundan əlavə, çörək də gizli natrium mənbəyi hesab olunur — bir dilim çörəkdə təxminən 200 mq duz ola bilər.
4. Dondurulmuş pizza
Dondurulmuş pizzanın tərkibində emal olunmuş ət və duzlu pendir olduğu üçün natrium miqdarı yüksək olur. Həmçinin pomidor sousunun yarım stəkanında 400 mq-dan çox natrium ola bilər.
"İstehsalçılar pizzanın dadını artırmaq üçün çoxlu duz əlavə edirlər. Bir dilim dondurulmuş pizzada 1000 mq-dan artıq natrium ola bilər", deyə Şekelford qeyd edib.
5. Turşular
Turşuya qoyulmuş məhsullar konservasiya üsulu ilə hazırlandığı üçün yüksək duz miqdarı ehtiva edir. Ekspertin sözlərinə görə, bir bütöv marinad edilmiş xiyar gündəlik natrium normasının yarısını və ya daha çoxunu təşkil edə bilər.
6. Konservləşdirilmiş şorbalar
İlk baxışda şorba sağlam qida sayılsa da, konservləşdirilmiş variantlar adətən çox duzlu olur. Həkim təhlükəsiz seçim kimi evdə hazırlanmış və porsiyalar şəklində dondurulmuş şorbaları tövsiyə edir.
7. Şəkər
Hipertoniyası olan şəxslərə şəkərlə şirinləşdirilmiş qida və içkilərdən uzaq durmaq məsləhət görülür. Çünki şəkər artıq çəki və piylənməyə səbəb ola bilər.
Amerika Ürək Assosiasiyası kişilər üçün gündə maksimum 9 çay qaşığı, qadınlar üçün isə 6 çay qaşığı əlavə şəkər qəbulunu tövsiyə edir.
8. Trans və doymuş yağlar
Karen Şekelford bildirib ki, yüksək qan təzyiqi olan şəxslər doymuş və trans yağlarla zəngin qidalardan uzaq durmalıdır.
Doymuş yağlar süd məhsullarında, qırmızı ətdə və toyuq dərisində olur. Trans yağlar isə əsasən emal olunmuş və qablaşdırılmış məhsullarda mövcuddur.
"Bu yağlar "pis" xolesterin hesab edilən LDL səviyyəsini artırır, damarların daralmasına səbəb olur və nəticədə qan təzyiqini yüksəldərək ürək xəstəlikləri riskini artırır", deyə həkim vurğulayıb.
9. Alkoqol
Elmi araşdırmalar və Ümumdünya Səhiyyə Təşkilatı alkoqolun heç bir miqdarının sağlamlıq üçün təhlükəsiz olmadığını bildirir.
"Alkoqolun davamlı istifadəsi zamanla arterial təzyiqi artırır. Hətta bir dəfə qəbul edilən içki belə təzyiq dərmanlarının təsirini dəyişə bilər", deyə Şekelford xəbərdarlıq edib.
Ekspert əlavə edib ki, alkoqol yüksək kalorili olduğu üçün artıq çəkiyə səbəb olur və artıq çəki də hipertoniyanın əsas risk faktorlarından biridir.
Poliqon.info
