Rusiya XİN başçısı mətbuat konfransı zamanı səs-küy yaradan jurnalistə sərt reaksiya verib...
Poliqon xəbər verir ki, Sergey Lavrov Hindistanda keçirdiyi mətbuat konfransı zamanı çıxışına mane olan jurnalistə irad bildirib və onun zaldan çıxarılmasını tələb edib.
Hadisə Lavrovun çıxışı zamanı jurnalistlərdən birinin nazirin nitqinin tərcüməsini yüksək səslə işə salmasından sonra baş verib. Bu isə zalda səs-küy yaradaraq çıxışın gedişinə mane olub.
Rusiya XİN rəhbəri buna sərt reaksiya verib.
“Bizi tərk edə bilərsinizmi? Zəhmət olmasa, çıxa bilərsinizmi? Mən zarafat etmirəm. Uşaqlar, onu buradan çıxarın”, deyə Rusiya XİN rəhbəri jurnalistə müraciətlə bildirib.
Lavrov daha sonra əlavə edib ki, əgər qayda pozan şəxs mühafizə əməkdaşlarına müqavimət göstərərsə, ona qarşı silah tətbiq oluna bilər. Nazirin bu ifadəsi zalda diqqət çəkib və sosial şəbəkələrdə geniş müzakirələrə səbəb olub.
Hadisə Hindistanda keçirilən beynəlxalq tədbirlər çərçivəsində baş tutan mətbuat konfransı zamanı yaşanıb. Hadisədən sonra təhlükəsizlik əməkdaşlarının jurnalistə yaxınlaşdığı, lakin vəziyyətin daha da gərginləşmədiyi bildirilir.
Analitiklər hesab edirlər ki, Lavrovun sərt reaksiyası son dövrlər beynəlxalq tədbirlərdə təhlükəsizlik və informasiya nəzarəti məsələlərinin daha həssas xarakter almasından xəbər verir. Sosial şəbəkələrdə isə bəzi istifadəçilər Rusiya XİN başçısının açıqlamasını həddindən artıq sərt hesab edib, digərləri isə bunu tədbirin nizam-intizamının qorunması ilə əsaslandırıb.
Poliqon.info
