Ermənistanın siyasi arenası və media məkanı Baş nazir Nikol Paşinyanın rusiyalı iş adamı ilə bağlı başladığı məhkəmə qalmaqalı ilə çalxalanır.
Musavat.com xəbər verir ki, Paşinyan onun narkotik tərkibli göbələklərdən istifadə etdiyini iddia edən iş adamı Karapetyana qarşı rəsmi iddia qaldırıb. Baş nazir bu ifadələrin onun şərəf və ləyaqətini təhqir etdiyini əsas gətirərək, qarşı tərəfdən 15 min dollardan çox təzminat tələb edir. İddia sənədində yalnız pul tələbi deyil, həm də maraqlı bir şərt yer alıb; Paşinyan tələb edir ki, rusiyalı biznesmen öz sözlərini ən azı üç kütləvi informasiya vasitəsində, canlı efirdə video müraciət vasitəsilə rəsmən təkzib etsin. Bu qeyri-adi məhkəmə davası Ermənistan cəmiyyətində ironiya və təəccüblə qarşılanıb.
Ekspertlər bildirirlər ki, ölkə rəhbərinin bu dərəcədə spesifik bir ittihama görə məhkəməyə müraciət etməsi, daxili siyasi gərginliyin və şəxsi ədavətin pik həddə çatdığını göstərir. Karapetyan tərəfi hələlik bu tələblərə rəsmi cavab verməsə də, sosial şəbəkələrdə Paşinyanın bu addımı "göbələk diplomatiyası" kimi lağa qoyulur. Hüquqşünaslar qeyd edirlər ki, bu növ təhqir iddialarının sübut olunması və təzminatın ödənilməsi prosesi uzunmüddətli hüquqi prosedurlar tələb edə bilər.
Musavat.com
