Çexiya polisi Yablonnadakı bazilikdən oğurlanmış Müqəddəs Zdislavanın kəllə sümüyünü tapıb.
Publika.az xəbər verir ki, bu barədə Polşanın "Vedomosti" nəşri məlumat yayıb.
Saytın məlumatına görə, oğru 13-cü əsrə aid dəyərli qalığın üzərinə beton tökübmüş. Mütəxəssislər hazırda onu zədələmədən xilas etmək üçün çalışırlar.
"35 yaşlı şübhəli 14 mayda Mlada-Boleslavda həbs edilib. Lakin o, əvvəllər Yablonnada yaşayıb və yerli bazilikanı yaxşı tanıyırmış",- nəşr yazıb.
Polis orqanının sözçüsü İvana Balakova isə bildirib ki, müstəntiqlər şübhəlinin heç bir müqavimət göstərmədiyini və oğurluq, əmlaka ziyan vurmaqla bağlı günahını etiraf etdiyini deyiblər. Onu səkkiz ilə qədər həbs cəzası gözləyir.
"Saxlanılan şəxs iddia edib ki, kəllənin kilsədə nümayiş etdirilməsi qərarı ilə razılaşmadığı və guya onu gizli şəkildə basdırmaq istədiyi üçün oğurlayıbmış. O, mayın 15-də kəlləni çayda batırmağı planlaşdırıb", - deyə Balakova bildirib.
