Yəmənin Mərib vilayətində pilotsuz uçuş aparatının vurulduğu bildirilsə də, ABŞ tərəfi məlumatı hələ təsdiqləməyib...
Poliqon xəbər verir ki, Yəməndə fəaliyyət göstərən husi hərəkatı ABŞ-yə məxsus MQ-9 Reaper tipli pilotsuz uçuş aparatını Mərib vilayətinin Safer rayonu üzərində vurduqlarını iddia edib.
Yerli mənbələrin məlumatına görə, insident ölkənin şimal-şərqində yerləşən strateji əhəmiyyətli Safer bölgəsində baş verib. Həmin ərazi uzun müddətdir husilərlə hökumətyönlü qüvvələr arasında qarşıdurmaların əsas mərkəzlərindən biri hesab olunur.
Bununla belə, husilərin rəsmi hərbi nümayəndəsi Yahya Saree hadisə ilə bağlı hələlik rəsmi bəyanat verməyib. ABŞ hərbi dairələri də pilotsuz uçuş aparatının itirilməsi barədə məlumatı nə təsdiq, nə də təkzib edib.
MQ-9 Reaper ABŞ ordusunun əsas kəşfiyyat və zərbə pilotsuz aparatlarından biri sayılır. Bu tip PUA-lar yüksək dəqiqlikli müşahidə, hədəf izləmə və raket zərbələrinin endirilməsi üçün istifadə olunur. ABŞ son illərdə Yəmən və Qırmızı dəniz regionunda husi qüvvələrinin fəaliyyətini izləmək məqsədilə bu aparatları intensiv şəkildə tətbiq edir.
Ekspertlər bildirirlər ki, məlumat təsdiqlənərsə, bu, husilərin hava hücumundan müdafiə imkanlarının artdığını göstərə bilər. Son aylarda husilər bir neçə dəfə ABŞ və müttəfiq qüvvələrə məxsus pilotsuz aparatları vurduqlarını açıqlasalar da, bu iddiaların bir hissəsi müstəqil şəkildə təsdiqlənməyib.
Regionda vəziyyət Qəzza müharibəsi fonunda daha da gərginləşib. Husilər Qırmızı dənizdə və ətraf sularda beynəlxalq gəmiçiliyə qarşı hücumlarını davam etdirir, ABŞ və müttəfiq qüvvələr isə buna cavab olaraq Yəməndə husi mövqelərinə zərbələr endirirlər.
Poliqon.info
