Bakı, 18 may, AZƏRTAC
Səudiyyə Ərəbistanının hava hücumundan müdafiə qüvvələri İran tərəfindən buraxıldığı bildirilən üç hücum dronunu ələ keçirib.
AZƏRTAC xəbər verir ki, bu barədə Səudiyyə Ərəbistanı Müdafiə Nazirliyi məlumat yayıb.
Açıqlamada deyilir: “Səudiyyə Ərəbistanının hava məkanına daxil olduqdan sonra üç dron ələ keçirilərək məhv edilib”.
Nazirliyin sözçüsü general-mayor Turki Al-Malikinin bildirdiyinə görə, dronların İraq ərazisindən buraxıldığı ehtimal olunur.
O əlavə edib ki, Səudiyyə Ərəbistanı “uyğun vaxtda və yerdə cavab vermək hüququnu özündə saxlayır” və ölkənin suverenliyi və təhlükəsizliyinə qarşı cəhdlərin qarşısını almaq üçün bütün zəruri tədbirləri görəcək.
