Bir neçə gün öncə, Bakıda, “Gənclik” metrostansiyası yaxınlığındakı avtomobil tunelində baş verən ağır qəzanın səbəbi sosial şəbəkələrdə müzakirə mövzusu olub. Bəzi sürücülər gündüz saatlarında yolda xətlənmə işlərinin aparılmasının yolverilməz olduğunu bildiriblər.
Belə olduğu halda hüquqi baxımdan məsuliyyəti kim daşıyır?
Məsələ ilə bağlı Pravda.az-a açıqlama verən “Ekspert-SM LTD” MMC-nin hüquqşünası Afaq Əliyevanın sözlərinə görə, hüquqi baxımdan belə vəziyyətlərdə məsələ avtomatik olaraq yalnız sürücünün günahı kimi qiymətləndirilmir.
O bildirib ki, hər şey konkret hallardan və sübutlardan asılıdır: “Sübut olunsa ki, yolda işlər aparılırdı (nişanlama, təmir və s.), xəbərdaredici nişanlar qoyulmamışdı, ərazi təhlükəsiz şəkildə işarələnməmişdi, qorunmamışdı və bu vəziyyət qəzanın əsas səbəbi olub, bu halda qəzaya səbəb kimi yol xidmətinin məsuliyyəti ola bilər. O halda məsuliyyət işi görən və ya təşkil etməli olan qurumun üzərinə düşə bilər. Bu, isə mülki, vəzifəli şəxslərin inzibati məsuliyyəti, bəzən isə ciddi pozuntu olduqda digər hüquqi nəticələrə gətirib çıxara bilər”.
Hüquqşünas qeyd edib ki, sürücü də avtomatik günahsız sayılmır, polis və ya sığorta adətən hadisəni ilkin olaraq sürücünün qayda pozuntusu kimi qeydə alır (məsələn: “təhlükəsiz sürət seçməmək”, “yol şəraitini nəzərə almamaq”): “Əgər təhlükəni əvvəlcədən görmək mümkün idisə, sürət azaldılmayıbsa, ehtiyatlılıq gözlənilməyibsə yol işlərində günah olsa belə, sürücüyə məsuliyyət düşə bilər. Qarışıq məsuliyyət ola bilər. Əksər zaman isə sürücünün qismən günahı tanınır, eyni zamanda yol təşkilatının da məsuliyyəti müəyyən edilir, zərər isə məhkəmə və ya sığorta vasitəsilə bölüşdürülür. Bunun üçün sübutlar vacibdir. Sübutlara hadisə yerindən foto/video, xəbərdaredici nişanların olmaması, şahid ifadələri, yol xidmətinin aktı, ekspertiza daxildir. Həqiqətən xəbərdaredici nişanlar qoyulmayıbsa və yol xətlənmə işləri təhlükə yaradıbsa, yol təşkilatının məsuliyyəti də müəyyən edilə bilər, amma bu, adətən araşdırma və ya məhkəmə yolu ilə həll olunur”.
Şəhanə Quliyeva
