Cinayət hadisəsi nifrət əsasında törədilmiş hücum kimi araşdırılır...
Poliqon xəbər verir ki, ABŞ-ın Kaliforniya ştatının San-Dieqo şəhərindəki İslam Mərkəzinə silahlı hücum nəticəsində üç nəfər həyatını itirib. CBS News telekanalının məlumatına görə, hücumu törətməkdə şübhəli bilinən 17 və 18 yaşlı iki yeniyetmə məsciddən bir neçə küçə aralıda avtomobil içərisində intihar edib.
Hücum nifrət əsasında törədilmiş cinayət kimi araşdırılır. Həlak olanlar arasında İslam Mərkəzinin mühafizəçisi də var. Polis rəhbərliyinin qənaətinə görə, o, "daha böyük miqyaslı faciənin qarşısının alınmasında əsas rol oynayıb". San-Dieqo polis rəisi Skott Val mətbuat konfransında bildirib ki, hadisədən qısa müddət əvvəl şübhəlilərdən birinin anası polisə müraciət edərək oğlunun, eləcə də evdəki bir neçə odlu silahın və öz avtomobilinin itkin düşdüyünü bildirib.
ABŞ prezidenti Donald Tramp atışmanı "dəhşətli hadisə" adlandıraraq reaksiya verib. Kaliforniya qubernatoru Qavin Nyusom isə həlak olanların ailələrinə başsağlığı verərək bildirib: "Bütün dünyada müminlər həyatları üçün qorxu içində yaşamamalıdır. Nifrətin Kaliforniyada yeri yoxdur və biz dini icmalara qarşı terror və ya intimidasiya aktlarına dözüm göstərməyəcəyik."
Qeyd edək ki, İslam Mərkəzi San-Dieqo mahalındakı ən böyük məsciddir. Mərkəzin tərkibinə 5 yaş və yuxarı şagirdlər üçün ərəb dili, islamşünaslıq və Quran kursları təklif edən Əl-Rəşid məktəbi də daxildir.
Poliqon.info
