ain.az, Modern.az portalına istinadən məlumat verir.
İran nüvə proqramını uzunmüddətli dondurmağa razılaşıb, lakin bir şərtlə: Tehran 400 kq yüksək zənginləşdirilmiş uran ABŞ-a deyil, Rusiyaya verəcək. Bu, Vaşinqtona Pakistan vasitəsilə təqdim edilən yenilənmiş İran sülh təklifinin əsas detallarından biridir.Modern.az xəbər verir ki, bu barədə “Əl-Ərəbiyə” məlumat yayıb.
Telekanala sızdırılan məlumatlara görə, yenilənmiş İran təklifi Tehrana “özünü qorumağa” imkan verəcək siyasi formulalı, uzunmərhələli atəşkəsi nəzərdə tutur.
İran nüvə proqramını ləğv etməyə deyil, dondurmağa hazırdır. 400 kq yüksək zənginləşdirilmiş uranın Rusiyaya verilməsi planlaşdırılır.
Hormuz boğazına gəldikdə, İran Pakistan və Omanın zəmanətçi kimi iştirakı ilə boğazın mərhələli və təhlükəsiz şəkildə açılmasını təklif edir. Eyni zamanda dəniz marşrutunun nüvə məsələsindən ayrılması təklif olunur.
Nüvə proqramı və uranın zənginləşdirilməsi kimi daha mürəkkəb məsələlər isə danışıqların növbəti mərhələlərinə saxlanılır.
“Axios” portalının məlumatına görə, amerikalı bir rəsmi yenilənmiş təklifi əvvəlki versiya ilə müqayisədə yalnız cüzi irəliləyiş hesab edir və bunun razılaşma üçün yetərli olmadığını düşünür. Vaşinqton hələlik yalnız İranın dondurulmuş aktivlərinin dörddə birini azad etməyə razılaşıb, Tehran isə bu mövqeyin yenidən nəzərdən keçirilməsini istəyir.
İranın “Tasnim” agentliyi bildirib ki, ABŞ danışıqlar müddətində neft sanksiyalarına müvəqqəti istisna tətbiq etməyə razılaşıb, lakin rəsmi Tehran bunu təsdiqləməyib.
İsraildə isə Donald Trampın təhlükəsizliklə bağlı əsas məsələləri həll etmədən Tehranla kompromis razılaşma bağlaya biləcəyindən narahatdırlar.
Tramp administrasiyasının daxilində də birlik yoxdur: bəzi rəsmilər, xüsusilə Müdafiə Nazirliyinin nümayəndələri İrana qarşı daha sərt mövqeni dəstəkləyir, digərləri isə diplomatiyanın tərəfdarıdır.
Bu arada Tramp bildirib ki, “İran üçün vaxt tükənir” və “daha sərfəli razılaşma”dan imtina ediləcəyi təqdirdə nəticələrlə hədələyib. O, eyni zamanda Tehrandan yenilənmiş təklif gözlədiyini deyib.
Hadisənin gedişatını izləmək üçün ain.az saytında ən son yeniliklərə baxın.
