Qəzet qeyd edir ki, Amerika rəsmiləri, digər addımlarla yanaşı, Kuba İnqilabının liderlərindən biri, ordu generalı Raul Kastronun əsir götürülməsi imkanını da müzakirə edirlər. Lakin ABŞ hərbçiləri təkcə bir və ya iki nəfərin ələ keçirilməsi deyil, bütöv bir variantlar paketini nəzərdən keçirirlər. Mümkün hərbi əməliyyatların miqyası Kuba rəhbərliyini qorxutmaq və güzəştə getməyə məcbur etmək məqsədilə həyata keçiriləcək birdəfəlik hava zərbəsindən tutmuş, hakimiyyəti tamamilə devirmək üçün qurudan hərbi müdaxiləyə qədər dəyişir. Məlumata görə, ABŞ Silahlı Qüvvələrinin Cənub Komandanlığı son bir neçə həftə ərzində adaya qarşı hərbi əməliyyat planlarının hazırlanmasına başlayıb.
Mayın 14-də "Axios" portalının öz mənbələrinə istinadən yaydığı məlumata görə, MKİ direktoru Con Retkliff Kubaya səfəri zamanı Vaşinqtonun adada islahatlar aparılacağı təqdirdə iqtisadiyyat və təhlükəsizlik sahəsində əməkdaşlığa hazır olduğunu bildirib. Martın 5-də isə ABŞ lideri Donald Tramp bəyan etmişdi ki, Vaşinqton İrana qarşı hərbi əməliyyat başa çatdıqdan sonra Kubaya qarşı növbəti fəaliyyət kursunun hazırlanması ilə məşğul olmaq niyyətindədir. O, bundan əvvəl dəfələrlə iddia etmişdi ki, ABŞ-nin təzyiqi ilə Venesueladan bu ada dövlətinə neft tədarükü dayandırıldıqdan sonra Kuba hökuməti və iqtisadiyyatı çökmək üzrədir. Fevralın 27-də isə Amerika administrasiyasının rəhbəri ABŞ-nin Kuba üzərində "dostcasına nəzarət bərqərar edə biləcəyini" elan etmişdi.
