Böyük Britaniyada aparılan yeni bir araşdırma, mədəniyyət və sənət fəaliyyətləri ilə məşğul olmağın yaşlılıq dövründə qarşılaşa biləcəyimiz mühüm sağlamlıq problemlərinin qarşısını ala biləcəyini ortaya qoyub.
Pravda.az bildirir ki, "Proceedings of the National Academy of Sciences" jurnalında dərc olunan araşdırmaya görə, sənət fəaliyyətləri yaşlılıq dövründə fiziki və psixi sağlamlığın qorunmasında böyük rol oynayır.
Tədqiqatçılar 50 və daha yuxarı yaşda olan 7 mindən çox insanın məlumatlarını təhlil ediblər. İştirakçıların muzeylərə, sənət qalereyalarına, konsertlərə, teatrlara və ya kinoteatrlara getmə tezliyi araşdırılıb.
Sənətin sağlamlığa möcüzəvi təsirləri
Araşdırmanın nəticələrinə görə, mədəniyyət və sənət tədbirlərində mütəmadi olaraq iştirak edən insanlarda aşağıdakı müsbət dəyişikliklər müşahidə olunub:
Fiziki qocalmanın gecikməsi: Sənətlə maraqlanan yaşlı şəxslərdə fiziki hərəkətliliyin azalması və xroniki ağrıların yaranma riski daha aşağıdır.
Zehni sağlamlığın qorunması: Bu fəaliyyətlər koqnitiv (zehni) funksiyaların zəifləməsinin və demans (ağıl zəifliyi) riskinin qarşısını almağa kömək edir.
Depressiya riskinin azalması: Sənət tədbirlərinə tez-tez qatılan insanlarda depressiyaya düşmə ehtimalı xeyli azdır.
Uzun ömür: Tədqiqat, mədəniyyət və sənətlə dərindən məşğul olan insanların daha uzun və keyfiyyətli bir ömür sürdüyünü göstərir.
Qeyd: Yaşınızdan asılı olmayaraq həyatınıza sənəti daxil etmək, gələcəyinizə edə biləcəyiniz ən gözəl sərmayələrdən biridir. Ayda ən azı bir dəfə teatra, konsertə və ya muzeyə vaxt ayırmaq həm ruhunuza, həm də bədəninizə yaxşı təsir edəcək.
Əminə Bayramova
