Rusiya və Çin arasında strateji əhəmiyyət daşıyan “Power of Siberia 2” qaz kəməri layihəsi ilə bağlı gözlənilən razılaşma əldə olunmayıb.

Pekində keçirilən yüksək səviyyəli danışıqlardan sonra Kremlin sözçüsü Dmitry Peskov açıqlama verərək layihənin icra müddətləri və tikinti qrafiki ilə bağlı hələ də yekun qərarın olmadığını bildirib.

Peskovun sözlərinə görə, tərəflər layihənin ümumi parametrləri və marşrutu üzrə müəyyən anlaşmaya gəlsələr də, bir sıra texniki məsələlər açıq qalır. O, hazırkı vəziyyəti Rusiya üçün “əhəmiyyətli nailiyyət” kimi təqdim etməyə çalışıb.

Analitiklər hesab edirlər ki, layihə ilə bağlı qeyri-müəyyənlik Rusiyanın enerji strategiyası üçün ciddi siqnaldır. Çünki Moskva Avropa bazarındakı itkilərdən sonra Çin istiqamətini əsas çıxış yolu kimi görürdü.

Ekspertlərin fikrincə, Pekinin müqaviləni sürətlə imzalamağa tələsməməsi Çinin daha sərfəli şərtlər əldə etmək istəyi və Rusiyanın zəifləyən iqtisadi mövqeyindən maksimum istifadə etməyə çalışması ilə bağlı ola bilər.

“Sibirin gücü – 2” layihəsi Rusiyanın Çinə böyük həcmdə qaz ixracını nəzərdə tutur və Kremlin gələcək enerji planlarında əsas layihələrdən biri hesab olunur.

• Müqavilə
• Siyasət
• Kremlin
• Milyardlıq Layihə