Ümumdünya Səhiyyə Təşkilatı (ÜST) Demokratik Konqo Respublikasında (DKR) geniş yayılan nadir Ebola virusu növünə qarşı hazırlanacaq peyvəndin hazır vəziyyətə gəlməsinin doqquz ay çəkə biləcəyini açıqlayıb.
AFN.az xəbər verir ki, təşkilat yoluxma və ölüm hallarının artmağa davam edəcəyi barədə ciddi xəbərdarlıq edib.
DKR-in şərqindəki İturi və Şimali Kivu əyalətlərində başlayan yeni Ebola epidemiyası qonşu Uqandaya da sıçrayaraq regional böhrana çevrilib.
ÜST-ün məlumatına görə, indiyədək 600 şübhəli yoluxma və 139 şübhəli ölüm qeydə alınıb. Virusun inkubasiya və aşkarlanma müddətləri nəzərə alındıqda, bu rəqəmlərin ciddi şəkildə artması gözlənilir.
ÜST vəziyyəti qlobal səviyyədə aşağı riskli hesab etsə də, milli və regional miqyasda fövqəladə vəziyyət elan edib. Həyatını itirənlər arasında səhiyyə işçilərinin də olması və tibb mərkəzlərinin tam dolması bölgədəki humanitar böhranın dərinliyini göstərir.
"Sərhədsiz Həkimlər" təşkilatı xəstəxanalarda şübhəli şəxslər üçün yer qalmadığını və qoruyucu avadanlıq çatışmazlığı yaşandığını bildirir.
Epidemiyanı çətinləşdirən əsas amil daha əvvəl rast gəlinən "Zair" növündən fərqli olaraq, on ildən çoxdur görünməyən "Bundibugyo" növünün ortaya çıxmasıdır. Tarixdə cəmi iki dəfə qeydə alınan və yoluxanların üçdə birini öldürən bu növə qarşı təsdiqlənmiş peyvənd və ya xüsusi dərman müalicəsi yoxdur.
İlk dəfə aprel ayında bir tibb bacısının ölümü ilə başlayan və qızıl mədənlərinin olduğu qəsəbələrə yayılan virus ilkin mərhələdə malyariya və tif xəstəlikləri ilə oxşar simptomlar göstərdiyi üçün fərq edilməyib.
ÜST rəsmiləri "Bundibugyo" növünə qarşı laboratoriyada hazırlanan iki potensial peyvənd namizədi üzərində işlərin getdiyini, lakin hələlik heç birinin klinik sınaq mərhələsinə çatmadığını bildirib.
Ən ümidverici peyvənd namizədinin hazır olması üçün 6-9 ay vaxt lazım ola bilər. Digər peyvənd namizədinin 2-3 ay ərzində klinik sınaqlara hazır ola biləcəyi, lakin heyvan sınaqlarının nəticələrindən asılı olaraq böyük qeyri-müəyyənlik daşıdığı qeyd edilir.
ABŞ-ın epidemiyanın aşkarlanmasında gecikildiyi barədə tənqidlərinə cavab verən ÜST rəsmiləri illərdir münaqişələrin davam etdiyi və səhiyyə infrastrukturunun zəif olduğu Şərqi Konqo kimi mürəkkəb bir coğrafiyada virusun növünü müəyyən etməyin son dərəcə çətin olduğunu və böyük səy tələb etdiyini müdafiə ediblər.
