Müəllif: Tamara Mustafayeva, Banco.az
“Goldman”: Mərkəzi bankların qızıla tələbatı artacaq və bu da qiymətləri dəstəkləyəcək.
Banco.az xəbər verir ki, “Goldman Sachs”ın qiymətləndirməsinə görə, mərkəzi bankların qızıl alışlarını artıracağı gözlənilir və bu meyl qızıl qiymətlərinin ilin sonuna doğru yenidən yüksəlməsini dəstəkləyə bilər.
Bankın analitikləri 2026-cı il ərzində mərkəzi bankların aylıq orta hesabla 60 ton qızıl alacağını proqnozlaşdırırlar. Mart ayında isə 12 aylıq hərəkətli orta göstərici 50 ton səviyyəsində qeydə alınıb ki, bu da əvvəlki proqnozlardan xeyli yüksəkdir.
Analitiklər qızıla olan güclü struktur tələbin davam etdiyini bildirərək, son geosiyasi hadisələrin ehtiyatların şaxələndirilməsi meylini daha da gücləndirdiyini vurğulayıblar.
Yaxın Şərqdə davam edən müharibə və enerji qiymətlərindəki artımın yaratdığı inflyasiya təzyiqi mərkəzi bankları sərt pul siyasəti yürütməyə məcbur edir. Bu vəziyyət isə qızıl qiymətləri üzərində qısamüddətli təzyiq yaradır.
Buna baxmayaraq, Dünya Qızıl Şurasının məlumatları göstərir ki, mərkəzi banklar 2026-cı ilin birinci rübündə ümumilikdə 244 ton qızıl alıblar.
Bizi sosial şəbəkələrdən izləyin!!
