BAKI, 21 may. TELEQRAF
Ukrayna Silahlı Qüvvələri cəbhə xəttinin müxtəlif sektorlarında taktiki təşəbbüsü bərpa edir.
Teleqraf xəbər verir ki, bu barədə ABŞ-nin Müharibə Araşdırmaları İnstitutunun (ISW) təhlilində deyilir.
Ukrayna ordusu son aylarda müxtəlif istiqamətlərdə əks-hücumlar həyata keçirir. Nəticədə 2024-cü ilin avqust ayında keçirilən Kursk əməliyyatından sonra ən böyük irəliləyiş əldə edilib.
Ukrayna qoşunları 2025-ci ilin noyabrından bəri Kupyanskın əhəmiyyətli hissəsini geri alıb, 2026-cı ilin qış-yaz aylarında ölkənin cənubunda 400 km2-dən çox ərazini azad edib, aprelin sonundan etibarən Zaporojye vilayətinin qərbində bir neçə yaşayış məntəqəsini azad edib.
ABŞ analitikləri vurğulayırlar ki, Ukrayna ordusunun ölkənin cənubundakı əks-hücumları Rusiyanı qüvvələrini müxtəlif istiqamətlər üzrə bölüşdürməyə məcbur edib. Həmçinin qeyd olunur ki, ilin əvvəllərindən bəri Rusiya logistikasına, hərbi texnikasına və canlı qüvvəsinə qarşı Ukraynanın ortamənzilli hücum kampaniyası rus ordusunun bütün cəbhədə hücum əməliyyatları aparmaq imkanlarına mənfi təsir göstərib. Bu, Ukrayna qüvvələrinin son zamanlardakı irəliləyişinə də töhfə verib.
ISW-nin proqnozuna görə, Ukrayna ortamənzilli hücum kampaniyasını genişləndirəcək və cəbhənin həssas hissələrində əks-hücumlarını davam etdirəcək. Bunun Rusiyanın planlaşdırılan hücum əməliyyatlarına daha da mane olacağı bildirilir.
