Ukrayna müdafiə sənayesi istehsalçıları beynəlxalq bazarda daha aktiv şəkildə mövqe qazanır və bildirirlər ki, onların məhsullarının əsas üstünlüyü poliqon sınaqları deyil, Rusiya ordusuna qarşı real döyüş təcrübəsidir.
HİT.az xəbər verir ki, bu barədə "Business Insider" yazır.
Rusiya tərəfindən tammiqyaslı işğaldan sonra Ukraynanın müdafiə sənayesi sürətlə inkişaf edib. Müharibə illərində ölkə pilotsuz uçuş aparatları, radioelektron mübarizə sistemləri və müasir döyüş texnologiyaları sahəsində qlobal mərkəzlərdən birinə çevrilib.
İndi Ukrayna şirkətləri bu təcrübəni NATO ölkələri ilə əməkdaşlıq və beynəlxalq kontraktlara çevirməyə çalışır.
Ukrayna Milli Müdafiə Sənayesi Assosiasiyasının (NAUDI) rəhbəri Serhiy Qonçarov bildirib ki, yerli istehsalçılar Qərb şirkətlərinin bir hissəsi ilə müqayisədə üstünlüyü məhz gündəlik döyüş təcrübəsi sayəsində əldə ediblər.
Onun sözlərinə görə, Avropa şirkətləri çox vaxt məhsullarını sınaq nəticələri və ya kompüter modelləşdirməsi ilə sübut etməli olur, Ukrayna isə texnikanın real döyüş şəraitində necə işlədiyini birbaşa göstərə bilir.
Qonçarov qeyd edib ki, Ukrayna istehsalçıları hərbi müştərilərə sistemlərin real döyüşdə necə işlədiyini izah etməkdə daha rahatdır, çünki bu texnologiyalar hər gün Rusiya ordusuna qarşı istifadə olunur.
O əlavə edib ki, Ukrayna şirkətləri təkcə texnologiyanı deyil, həm də onun istifadəsi üzrə unikal təcrübəni təqdim edir: texnikanın servisi, operator hazırlığı və müasir təhdidlərə uyğunlaşdırılması.
“Biz bunun real döyüşdə necə işlədiyini göstərə bilirik. Bu təcrübə əvəzsizdir”, deyə NAUDI rəhbəri bildirib.
Xüsusilə pilotsuz sistemlər sahəsində Ukrayna müdafiə sənayesi sürətlə inkişaf edir. FPV-dronlar, zərbə dronları və onlara qarşı sistemlərin geniş istifadəsi ölkəni bu sahədə Avropanın ən təcrübəli aktorlarından birinə çevirib.
“Frontline Robotics” şirkətinin nümayəndəsi Mikita Rojkov “Business Insider”ə bildirib ki, Ukrayna şirkətləri davam edən müharibə sayəsində “qeyri-bərabər üstünlük” əldə edib.
“Bizdə müharibə var – təəssüf ki”, deyə o bildirib və qeyd edib ki, cəbhəyə yaxınlıq mühəndislərə dərhal geri dönüş almağa imkan verir.
Onun sözlərinə görə, Ukrayna istehsalçıları sistemlərin effektivliyi barədə məlumatı demək olar ki, fasiləsiz alır, çünki ordu onları hər gün istifadə edir.
“Bizə ayrıca rəy soruşmağa ehtiyac yoxdur – 24/7 gəlir”, deyə o vurğulayıb.
Məqalədə qeyd olunur ki, Qərb orduları və müdafiə şirkətləri Ukrayna texnologiyalarına, xüsusilə dron və radioelektron mübarizə sistemlərinə getdikcə daha çox maraq göstərir.
Səbəb Ukraynanın Rusiya ilə müharibə zamanı qazandığı geniş praktiki təcrübədir. NATO ölkələri hələ bu texnologiyaları öyrəndiyi halda, Ukrayna onları real döyüş şəraitinə uyğunlaşdırır. Xüsusilə İran istehsalı “Shahed” dronlarına qarşı mübarizə sistemləri diqqət çəkir.
Ukrayna Müdafiə Sənayesi Şurasının rəhbəri İhor Fedirko bildirib ki, Ukrayna texnologiyalarına artıq Yaxın Şərq ölkələri də maraq göstərir.
Ukrayna şirkətləri xarici istehsalçılarla birgə layihələr də qurur. Məsələn, Xorvatiyanın “ORQA” şirkəti Ukraynanın “General Cherry” dron istehsalçısı ilə əməkdaşlıq edir.
“ORQA” şirkətinin həmtəsisçisi Srçan Kovaceviç bildirib ki, Ukrayna ordusunun təcrübəsinin Qərbdə analoqu yoxdur. Onun sözlərinə görə, Ukrayna müharibə şəraitində kütləvi dron istehsalı və operativ uyğunlaşma bacarığı formalaşdırıb və bu təcrübə hazırda çox yüksək qiymətləndirilir.
Məqalənin yekununda qeyd olunur ki, Rusiya ilə müharibə Ukraynanı müasir müharibənin “laboratoriyasına” çevirib, burada texnologiyalar daim real təhdidlərə uyğunlaşdırılır.
Buna görə də Ukrayna müdafiə sənayesi artıq yalnız yardım alan sektor kimi deyil, gələcək Avropa müdafiə sisteminin tamhüquqlu iştirakçısı kimi qiymətləndirilir.
Samir
