ain.az, Azpolitika.az portalına istinadən məlumat yayır.
Ermənistanın hüquq-mühafizə orqanları müxalif fəal, "Ana Ermənistan" hərəkatının lideri və "Çiçəklənən Ermənistan" Partiyasının seçki siyahısında ikinci sırada yer alan deputatlığa namizəd Andranik Tevanyana qarşı ağır ittihamlar irəli sürüb. O, xarici xüsusi xidmət orqanlarına casusluq etməkdə və külli miqdarda rüşvət qarşılığında dövlət sirrini ötürməkdə günahlandırılır.
"AzPolitika" erməni mediasına istinadən xəbər verir ki, bu gün səhər saatlarında Ermənistan Milli Təhlükəsizlik Xidmətinin (NSS) maskalı xüsusi təyinatlıları "Ana Ermənistan" Partiyasının ofisində və Tevanyanın mənzilində genişmiqyaslı axtarış və istintaq tədbirləri həyata keçirib.
Ermənistan İstintaq Komitəsinin yaydığı rəsmi bəyanata görə, Andranik Tevanyan barəsində "dövlətə xəyanət" və "casusluq" maddələri ilə cinayət işi açılıb.
İstintaq materiallarında iddia olunur ki, Tevanyan 2024-cü il ərzində xarici xüsusi xidmət orqanları tərəfindən məxfi əməkdaşlığa cəlb edilib. O, "Rusiya-Qafqaz" Geosiyasi Mərkəzinin rəhbəri statusunda çıxış edən xarici kəşfiyyat nümayəndəsinin tapşırığı ilə casusluq fəaliyyəti göstərib.
İttihama əsasən, Tevanyan Ermənistan parlamentinin 2024-cü ilin aprelində keçirilən qapalı və məxfi iclasının gedişatı, müzakirə olunan məsələlər və nəticələrinə dair məlumatları rus dilinə tərcümə edərək qarşı tərəfə ötürüb. Bu məxfi məlumatların müqabilində onun ümumilikdə 622 min ABŞ dolları məbləğində vəsait aldığı iddia edilir.
Maraqlı məqam ondan ibarətdir ki, Tevanyan deputatlıq mandatından hələ 2023-cü ilin avqustunda imtina edib. İstintaq orqanları onun 2024-cü ilin aprelindəki qapalı parlament iclasının materiallarını hansı yollarla və kimlərin vasitəsilə əldə etdiyinə dair hələlik əlavə təfərrüat açıqlamayıb.
Ofisində aparılan axtarışlardan sonra jurnalistlərə açıqlama verən Andranik Tevanyan ittihamları qətiyyətlə rədd edib, baş verənləri siyasi şou və "cəfəngiyat" adlandırıb:
"Bu, tam bir rüsvayçılıqdır. Nikol Paşinyan, mən sənin hansı dövlət xəyanət ilə məşğul olduğunu ifşa etmişəm və səni bağışlamayacağam. Mənə bu cür damğalar vurmaqla məqsədinə çata bilməyəcəksən. Məni bu cür cinayətdə ittiham etmək alınmayacaq. Amma biz sənə qarşı çox konkret ittihamlar irəli sürəcəyik – Qarabağı necə təhvil verdiyini, nəyin müqabilində güzəştə getdiyini soruşacağıq".
Tevanyan həmçinin bildirib ki, iddia olunan pullardan və xarici kəşfiyyatla əlaqələrdən ümumiyyətlə xəbərsizdir.
Partiya ofisindəki prosesdən sonra hüquq-mühafizə orqanları ilə müxalif siyasətçi və onun vəkili arasında insident yaşanıb. NSS əməkdaşları Tevanyanı öz xidməti avtomobilləri ilə aparmaq istəsələr də, ciddi müqavimətdən sonra onun yaxınlıqdakı evinə piyada getməsinə icazə veriblər.
Lakin Tevanyan mənzilinə daxil olarkən istintaq qrupunun artıq onun evində olduğunu görüb. Siyasətçi evdə heç kimin olmadığını və hüquq-mühafizə orqanlarına mənzilə daxil olmaq üçün icazə vermədiyini vurğulayıb. Binanın giriş qapısının və liftinin xüsusi şifrəli sistemlə işlədiyini deyən müxalifət lideri, müstəntiqlərin mənzilə hansı yolla daxil olduqlarını izah edə bilmədiklərini diqqətə çatdırıb.
"Ana Ermənistan" hərəkatının idarə heyətinin üzvü Aregnaz Manukyan isə məsələyə fərqli bir şübhəli məqam qatıb. O qeyd edib ki, bir neçə gün öncə iki naməlum şəxs Tevanyanın şifrəli liftlə qalxılan mənzilinə daxil olmağa cəhd göstərib və polis tərəfindən saxlanılaraq İstintaq Komitəsinə təhvil verilib. Manukyanın fikrincə, həmin hadisə ilə NSS-in bu gün mənzilə rahatlıqla daxil olması arasında birbaşa əlaqə ola bilər.
Qeyd edək ki, bu əməliyyat Ermənistan rəhbərliyinin xəbərdarlığından sonraya təsadüf edir. Baş nazir Nikol Paşinyan bir qədər əvvəl Vanadzorda keçirdiyi mitinqdə Ermənistan Milli Təhlükəsizlik Xidmətinin "Çiçəklənən Ermənistan" Partiyasının seçki siyahısında yer alan Andranik Tevanyana qarşı "vətənə xəyanət" maddəsi ilə cinayət işinin açılması üçün İstintaq Komitəsinə müvafiq materiallar təqdim edəcəyini açıq şəkildə anons etmişdi.
Ermənistanda seçkiönü və regional gərginlik fonunda baş verən bu həbs və ittiham dalğasının ölkədəki daxili siyasi qarşıdurmanı daha da kəskinləşdirəcəyi gözlənilir.
Rasim Əliyev
"AzPolitika.info"
Hadisənin gedişatını izləmək üçün ain.az saytında ən son yeniliklərə baxın.
