Televiziya aparıcısı Kendis Ouens ilə müsahibədə ABŞ-nin keçmiş prezidenti Co Baydenin oğlu Hanter Bayden narkotik asılılığı ilə mübarizəsindən danışıb və özünü "dibə enmiş krek aludəçisi" adlandırıb.
Musavat.com xarici mediaya istinadla xəbər verir ki, Hanter Baydenin sözlərinə görə, o, aludəçilik dövründə yaxınları ilə münasibətlərini məhv edən və qərarlarına təsir edən dəhşətli hərəkətlər edib. O etiraf edib ki, onun üçün ən çətin şey onu sevən insanlardan uzaqlaşmaqdır.
H.Bayden həmçinin deyib ki, şəxsi yazışmalarının, fotoşəkillərinin və digər məlumatların dərc olunmasından sonra bir seçimlə qarşılaşıb: yaşamağa davam etmək və ya tamamilə dağılmaq. Nəticədə, o, təzyiqə və ictimaiyyətin diqqətinə baxmayaraq, mübarizə aparmaq və ayıqlığını qorumaq qərarına gəldiyini bildirib.
Hanter Bayden qeyd edib ki, 1 iyun 2019-cu ildən bəri narkotikdən azaddır. O, iki ildir ki, probasiya xidmətinin nəzarəti altında narkotik testindən keçdiyini deyib.
Müsahibə zamanı Ouens 2023-cü ildə Ağ Evdə tapılan kokainin ona məxsus olub-olmadığını soruşub. Bayden iddiaları rədd edib və hətta binanın narkotik tapılan hissəsində belə olmadığını bildirib. O, həmçinin boşanmasının və şəxsi problemlərinin onun üçün "çox qaranlıq bir dövrə" səbəb olduğunu söyləyib. Bayden qardaşının bir dəfə ona belə davam edə bilməyəcəyini dediyini, bundan sonra yenidən yaşamaq və ya imtina etmək seçimi ilə qarşılaşdığını söyləyib.
Musavat.com
