Finlandiya Prezidenti Avropa İttifaqının müraciəti olacağı halda rolu nəzərdən keçirə biləcəyini deyib...
Poliqon xəbər verir ki, Finlandiya Prezidenti Alexander Stubb Avropa İttifaqı adından Rusiya ilə aparılacaq mümkün danışıqlarda vasitəçi rolunu üzərinə götürməyə hazır olduğunu bildirib.
Dövlət başçısı Finlandiyanın Yle telekanalına verdiyi açıqlamada qeyd edib ki, əgər müvafiq müraciət olarsa, belə bir missiyanı nəzərdən keçirməyə açıqdır. Stubb vurğulayıb ki, bu cür suallara mənfi cavab vermək çətindir və məsələ konkret siyasi şəraitdən asılı olacaq.
Onun sözlərinə görə, Avropa İttifaqı ilə Rusiya arasında mümkün dialoq perspektivi hələlik ilkin mərhələdədir və hər hansı vasitəçilik rolu yalnız kollektiv qərar əsasında müəyyən edilə bilər.
Qeyd olunur ki, son dövrlərdə Avropada təhlükəsizlik arxitekturası və Rusiya ilə münasibətlərin gələcəyi ilə bağlı müzakirələr intensivləşib. Bu kontekstdə Finlandiya prezidentinin açıqlaması Aİ daxilində mümkün danışıqlar mexanizmləri barədə yeni müzakirələrə səbəb olub.
Poliqon.info
