BAKI, 25 may. TELEQRAF
Hindistanın ölkəmizdəki səfiri Abhay Kumar Azərbaycan Yaradıcılıq Dərnəyinin təşkilatçılığı ilə ərsəyə gələn “Hindistan və Azərbaycan arasında Mədəni Körpülər” adlı sərginin rəsmi açılışını edib.
Teleqraf xəbər verir ki, tədbirdə Milli Məclisin deputatı Razi Nurullayev, yerli incəsənətsevərlər, gənclər və Hindistan diasporunun nümayəndələri iştirak ediblər.
Çıxışı zamanı diplomat Abhay Kumar iki ölkə arasında kökləri Tunc dövrünə qədər uzanan minillik sivilizasiya bağlarından bəhs edib.
O vurğulayıb ki, bu münasibətlər əsrlər boyu mənəvi mübadilələr vasitəsilə daha da möhkəmlənib.
Səfir çıxışında tarixi Atəşgah məbədinin əhəmiyyətinə xüsusi diqqət çəkib.
O bildirib ki, bu abidədə devanaqari əlifbası ilə həkk olunmuş bir neçə kitabə, eləcə də svastika, “Om”, Qaneşa və Nataraca təsvirləri kimi hind mənəvi simvolları qorunub saxlanılır.
Diplomat həmçinin Bollivud filmlərinin, musiqisinin, ənənəvi mətbəxin və yoqanın Azərbaycanda populyarlıq qazanmasını xalqlar arasındakı güclü yaxınlığın canlı göstəricisi kimi qiymətləndirib.
Abhay Kumar dahi Azərbaycan şairi Nizami Gəncəvinin yaradıcılığına da toxunaraq, onun Hindistanın ədəbi mühitinə və bir çox sənətkarlarına böyük təsir göstərdiyini, bununla da mühüm bir mədəniyyət körpüsü rolunu oynadığını əlavə edib.
Millət vəkili Razi Nurullayev isə coğrafi məsafəyə baxmayaraq, iki dövlət arasında dərin mənəvi bağlılığın mövcudluğunu diqqətə çatdırıb. Deputat bu əhəmiyyətli layihənin reallaşdırılmasına görə Azərbaycan Yaradıcılıq Dərnəyinə təşəkkürünü bildirib.
Sərgidə ortaq irs, mədəniyyət və dostluq motivlərini tərənnüm edən fərqli rəsm əsərləri nümayiş olunub.
Qonaqlara hind mətbəxinin ləziz təamlarından ibarət zəngin süfrə təqdim edilib.
Sərgi Hindistan və Azərbaycan xalqları arasında uzunmüddətli mədəni bağları və inkişaf edən dostluğu uğurla nümayiş etdirib.
Tədbir çərçivəsində “Kathak” rəqsi Fatimə Əliyeva tərəfindən ifa olunub, hind filmi mahnıları və rəqsləri isə Fatimə Hacızadə tərəfindən təqdim edilib.
.jpg)
.jpg)
.jpg)
