ain.az, Demokrat.az portalına istinadən məlumat verir.
Mütəxəssislər bildirirlər ki, düzgün seçilmiş qidalar rahat və keyfiyyətli yuxuya kömək edə, bəzi məhsullar isə əksinə, yuxu rejimini poza bilər. Araşdırmalara əsasən, müasir insanların çoxu həftə ərzində cəmi bir neçə gecə tam dincələ bilir və bunun əsas səbəblərindən biri də qidalanma vərdişləridir.
Alimlərin sözlərinə görə, “triptofan” adlı amin turşusu orqanizmdə serotonin və melatonin hormonlarının yaranmasına kömək edir. Bu hormonlar isə yuxu rejiminin tənzimlənməsində mühüm rol oynayır. Toyuq əti, yumurta, süd məhsulları və yulaf kimi qidalar triptofanla zəngindir. Xüsusilə süd və ya yoqurtun yulafla birlikdə qəbul edilməsi daha faydalı hesab olunur.
Bundan başqa, banan, tam taxıllı çörək və fıstıq yağı ilə hazırlanan yüngül qəlyanaltıların da yuxuya müsbət təsir göstərdiyi qeyd edilir. Araşdırmalarda yatmazdan əvvəl iki ədəd kivi yeməyin yuxu keyfiyyətini artırdığı bildirilib. Mütəxəssislər bunu kivinin serotonin və vitaminlərlə zəngin olması ilə əlaqələndirirlər.
İlıq süd içmək isə uzun illərdir tövsiyə olunan ənənəvi üsullardan biridir. Alimlər südün tərkibində az miqdarda melatonin hormonu olduğunu və bunun rahatlamağa kömək etdiyini deyirlər. Çobanyastığı, pişikotu və çarkıçiçəyi kimi bitkilərdən hazırlanan çayların da stressi azaltdığı və sakit yuxuya şərait yaratdığı vurğulanır. Həmçinin vişnə suyunun tərkibindəki melatonin və antioksidantların yuxunu yaxşılaşdırdığı bildirilir.
Mütəxəssislər bəzi qidaların isə yuxuya mənfi təsir göstərdiyini deyirlər. Xüsusilə kofeinli içkilər, çox şəkərli məhsullar və acılı yeməklər yuxu keyfiyyətini aşağı sala bilər. Araşdırmalara görə, rahat yatmaq istəyən şəxslər yatmazdan bir neçə saat əvvəl qəhvə qəbulundan uzaq durmalıdırlar.
Bundan əlavə, yatmazdan əvvəl ilıq duş qəbul etməyin bədən temperaturunu tənzimlədiyi və orqanizmə istirahət siqnalı verdiyi də qeyd olunur.Leyla
Demokrat.az
Daha ətraflı məlumat və yeniliklər üçün ain.az saytını izləyin.
