Bizimyol saytından əldə olunan məlumata görə, ain.az məlumat yayır.
Vəkil Bəhruz Orucov öz hesabında videomüraciət edərək bildirib ki, MTK-lar vətəndaşları mənzillərin sahəsi ilə bağlı aldadırlar.
O deyib ki, vətəndaş MTK ilə müqavilə bağlayır və müqavilədə mənzilin sahəsi, məsələn, 83 kvadrat metr göstərilir. Lakin sonradan daşınmaz əmlakın dövlət reyestrindən çıxarış alarkən məlum olur ki, mənzilin real sahəsi 71 kvadrat metrdir. Yəni 12 kvadrat metrlik fərq yaranır: “Bu məsələ ilə bağlı məhkəməyə müraciət olunub. Məhkəmə iddianı təmin edərək həmin fərqin vətəndaşa qaytarılması barədə qərar qəbul edib və qərar icra olunub. MTK-nın hesabına həbs qoyulduğuna görə şirkət həmin vəsaiti ödəməyə məcbur qalıb”.
Vəkilin sözlərinə görə, ümumiyyətlə, bəzi MTK-lar ölçmə işlərini qaydalara uyğun həyata keçirmirlər: “Elə MTK-lar var ki, mənzilin kvadratını çöldən hesablayırlar. Mənzilin sahəsinin 130 kvadrat metr olduğunu bildirirlər, lakin bunun necə hesablandığı soruşulduqda “çöldən hesablanıb” cavabı verilir. Bu isə tam qanunsuzdur”.
Qanunvericiliyə görə, mənzilin kvadratı necə hesablanmalıdır?Vətəndaş mənzilin sahəsini əvvəlcədən necə yoxlada bilər?
Bu barədə Bizimyol.info xəbər portalına danışan əmlak eksperti Elnur Azadov bildirib ki, qanunvericiliyə əsasən, balkon sahəsi də əmsalla hesablanmalıdır: “Əslində bu, çox geniş miqyaslı problemdir və mən hesab edirəm ki, Azərbaycan Respublikasında Mənzil Məcəlləsi və Tikinti Məcəlləsi üzrə bu kimi qanun pozuntuları ən geniş yayılmış hallardandır. Ona görə ki, Azərbaycanda indiyədək 2500-dən çox mənzilli bina – yenitikililər inşa olunub və bu problem demək olar ki, onların 99%-ində mövcuddur.
Tikinti və şəhərsalma məcəlləsinin 59.3-cü maddəsinə uyğun olaraq, mənzil sahəsinin hesablanma qaydaları belədir: mənzilin çöl və iç divarları, eləcə də havalandırma xətləri sahəyə daxil edilmir. Lakin tikinti şirkətləri adətən layihə üzrə hesablamalarda çöl və iç divarları, bəzi hallarda havalandırma xətləri və balkonu tam şəkildə hesablayırlar.
Halbuki qanunvericiliyə əsasən, balkon sahəsi də əmsalla hesablanmalıdır. Əgər mənzilin balkonu hər iki tərəfdən divarla bağlıdırsa, burada 0,5 əmsal tətbiq olunur. Əgər balkon yalnız bir tərəfdən bağlıdırsa, çıxıntılı balkondursa və ya terasdırsa, bu zaman 0,3 əmsal tətbiq edilir”.
Elnur Azadov həmçinin vurğulayıb: “Təəssüf ki, bu qanun mövcud olsa da, tikinti şirkətləri çox hallarda bu qaydalara zidd şəkildə mənzil sahəsinin hesablanmasını aparırlar. Bəzi hallarda isə bununla bağlı vətəndaşa bildiriş və ya arayış təqdim olunur və alqı-satqı müqaviləsində vətəndaş bu şərtləri qəbul etmiş olur. Yəni tikinti şirkətləri tərəfindən alternativ çıxış yolu kimi tətbiq edilən bu praktika mövcuddur, lakin bu, qanunvericiliyə ziddir.
Bizim ölkədə bu sahədə kifayət qədər çoxlu sayda bu kimi məhkəmə problemləri olub. Nə vaxt ki vətəndaş öz mənzil sahəsinin təkrar ölçülməsi ilə bağlı aidiyyəti dövlət qurumlarına müraciət edib, məhkəməni udub. Bu istiqamətdə kifayət qədər presedentlər var. Burada fərq etmir, üstündən 5 il, 10 il keçməsi önəm daşımır - vətəndaşlar kütləvi şəkildə bu istiqamətdə məhkəmələrə müraciət edə bilərlər”.
Elnur Azadov qeyd edib ki, tikinti şirkətləri özləri tərəfindən hazırlanmış müqavilələrlə çıxış edirlər: “Vətəndaşlara tövsiyə olunur ki, ümumiyyətlə hər hansı alqı-satqı əməliyyatı aparmazdan əvvəl mütləq vəkillərə və hüquqşünaslara müraciət etsinlər. Bu istiqamətdə tikinti şirkətləri ilə danışıqlar aparılsın və bildirilsin ki, alqı-satqı zamanı çöl və iç divarlar hesablanmadan müqavilə tərtib edilsin. Tikinti şirkətləri 99% hallarda özləri tərəfindən hazırlanmış müqavilələrlə çıxış edirlər. Vətəndaşlara tövsiyə olunur ki, müqavilədə hər hansı dəyişikliklərin qəbul edilməsinə çalışsınlar.
Təəssüf ki, bu məsələlərdə ziddiyyətlər var və vətəndaşlar çox vaxt olduğu kimi müqavilələrə imza atırlar. Əgər bina hələ tikilməkdədirsə, vətəndaş həmin mənzili natura olaraq ölçdürə bilmir. Hətta bünövrə mərhələsində və ya qismən inşa olunmuş sahələrdə bu kimi risklərdən qaçmaq üçün tövsiyə olunur ki, tikinti şirkətindən inşaat pasportu əldə olunsun.
İnşaat pasportunda bütün ölçülər var. Həmin ölçülər əsasında memarlar və qiymətləndirmə şirkətləri tərəfindən mənzilin faktiki sahəsini müəyyən etmək mümkündür. Çöl və iç divarların hesablanması zamanı həmin sənəd müqavilənin tərkib hissəsi kimi əlavə oluna bilər”.
Elnur Azadov əlavə edib: “Daha sonra tikinti şirkətləri ilə müqavilə bağlayarkən tövsiyə olunur ki, binanın inşa mərhələsinə uyğun şəkildə ilkin ödəniş olunsun. Yəni əgər bina bünövrə səviyyəsindədirsə və ya bir neçə mərtəbəsi inşa olunubsa, heç bir halda 50%-dən artıq ödəniş edilməməlidir.
Əgər bina artıq inşa olunub və ya tamamlanıb, lakin istismar aktı yoxdursa, bu halda heç bir halda 90%-dən çox ödəniş edilməməlidir. Qalan 5–10% ödənişlərin isə binanın istismara qəbulundan sonra həyata keçirilməsi tövsiyə olunur”.
Günel Həsənova, Bizimyol.info
Ən son xəbərləri və yenilikləri almaq üçün ain.az saytını izləyin.
