Digər vurğulamaq istədiyim məsələ BMT-nin qadınlara qarşı ayrı-seçkiliyin ləğv olunması üzrə, konvensiyasından irəli gələn öhdəliklərlə bağlıdır. Bilirsiniz ki, qlobal səviyyədə, doqquz insan hüquqları ilə bağlı konvensiya var. Azərbaycan Respublikası onun səkkizini ratifikasiya edib və müvafiq öhdəliklər həyata keçirməkdədir. Bunlardan biri də qadın hüquqları ilə bağlı konvensiyadır. 2022-ci ildə bununla bağlı Azərbaycan hökuməti də altıncı dövri məruzəsini BMT-yə təqdim elədi. Ondan təxminən bir ay sonra bizə 13 istiqamət üzrə 80 bənddən ibarət tövsiyələr verildi. Bu ümumi göstəricilər müqayisədə digər dövlətlərlə elə də çox göstərici deyil və bu istiqamətdə də məsələlərdən biri odur ki, bəzilərinin icrası qısa müddətdə həyata keçirildi, aylar ərzində, bəzi məsələlər isə açıqdır. Mənim sualım ondan ibarətdir ki, bu öhdəliklər hansı ki, bunlar qlobal səviyyədə, BMT səviyyəsində bizdən fəaliyyət gözləyirlər, və burda hesabatlılıq necədir və növbəti hesabatın təqdim olunması nə vaxta planlaşdırılır?
Və sonuncu mənim vurğulamaq istədiyim məsələ, elə bu gün paytaxtımızda baş tutan şəhərsalma forumudur. Xüsusilə, burda inklüzivliyin təmin istiqamətində olan fəaliyyət. Bu forumda 565 tədbir baş tutub və onların bir qismi qadınların rolu ilə bağlı idi. O tədbirlərin birində mən də iştirak elədim, həmkarlarımla bir yerdə. Növbəti nəzərdə tutulan ölkə Meksikanın səfiri də orda iştirak elədi. Azərbaycan qadınının cəmiyyətdə və ayrı-ayrı məsələlərlə bağlı fəaliyyəti ilə bağlı məlumatları eşidəndə, Meksika ilə müqayisədə burda çox məsələlərin öndə olduğunu və təcrübə payı olaraq bölüşmək istədiklərini bildirdilər. Digər mühüm məsələ gənclərlə bağlıdır. Bilirsiniz, biz orda çoxsaylı könüllüləri gördük. Həqiqətən çox qürurvericidir. Çünki BMT Bakıya gəlib və həmin ərazi ekstraterritorial, Azərbaycan ərazisi yox, BMT ərazisidir. Və həmin gənc insanların bundan sonra beynəlxalq səviyyədə təcrübə qazanması və öz tərcümeyi-halına belə bir mühüm tədbiri, hətta COP29-la bağlı digər tədbirlərlə bağlı məlumatları daxil etməsi onu göstərir ki, Azərbaycan Prezidenti cənab İlham Əliyevin siyasətinin əsasında Azərbaycan vətəndaşı və onun inkişafı ilə bağlı məsələlər yer alır".
