"Azərbaycanda dövriyyədə olan nağd pul vəsaitlərinin artması iqtisadiyyatda həm müəyyən risklər, həm də bəzi imkanlar yaradır. Bir tərəfdən, nağd pulun çoxluğu iqtisadi aktivliyin və istehlak xərclərinin artdığını göstərə bilər. Əhalinin gəlirlərinin yüksəlməsi, ticarət dövriyyəsinin genişlənməsi və regionlarda iqtisadi canlanma nağd vəsaitə tələbi artıran əsas amillər sırasında göstərilir. Xüsusilə kiçik biznes və xidmət sektorunda nağd ödənişlər əməliyyatların daha sürətli və rahat həyata keçirilməsi baxımından üstün tutulur. Digər tərəfdən isə nağd pul dövriyyəsinin yüksək olması kölgə iqtisadiyyatının genişlənməsi riskini artırır. Nağd hesablaşmaların çoxluğu vergi nəzarətini çətinləşdirə, maliyyə şəffaflığını azalda və qeyri-rəsmi iqtisadi fəaliyyətin həcmini böyüdə bilər. Bundan əlavə, banklardan kənarda böyük həcmdə vəsaitin saxlanılması maliyyə resurslarının bank sektoruna cəlb olunmasını zəiflədə bilər".
Bu fikirləri Aznews.az-a açıqlamasında Liberal İqtisadçılar Mərkəzinin sədri Akif Nəsirli deyib.
Qeyd edək ki, Azərbaycanda banklardan kənarda dövriyyədə olan nağd pul vəsaitlərinin həcmi artmaqda davam edir. Mərkəzi Bankın son statistik göstəriciləri göstərir ki, həm əhali, həm də biznes subyektləri arasında nağd hesablaşmalara maraq hələ də yüksək olaraq qalır. Xüsusilə regionlarda, kiçik ticarət və xidmət sektorunda nağd ödənişlərin geniş yayılması bu tendensiyanı gücləndirən əsas amillərdən biri kimi qiymətləndirilir. İqtisadçılar bildirirlər ki, dövriyyədəki nağd pul kütləsinin artmasına yalnız alış-veriş vərdişləri deyil, eyni zamanda inflyasiya, nominal əməkhaqlarının yüksəlməsi, istehlak xərclərinin artması və müəyyən hallarda vətəndaşların bank sisteminə etimad səviyyəsi də təsir edir.
A. Nəsirli qeyd edib ki, bu hal kreditləşmə imkanlarının azalmasına və ümumi maliyyə dövriyyəsinə mənfi təsir göstərən əsas amillərdən biri hesab olunur.
