Nazim Eynallı,
AAYDA nəzdində 19 saylı Xüsusi Təyinatlı Yol İstismarı MMC-nin rəhbəri
Bu günlərdə müsəlman dünyası müqəddəs Qurban Bayramını qeyd edir. Bayram namazı qılır, qurban kəsir, yaxınlarını ziyarət edir, kasıb və ehtiyacı olan ailələrə yardım göstərirlər. Kəsilən qurbanlıq ətinin paylaşılması bayramın əsas mənəvi xüsusiyyətlərindən biridir. Bu, insanlar arasında həmrəylik, xeyirxahlıq və qarşılıqlı hörmət hisslərini daha da gücləndirir.
Azərbaycan xalqı da əsrlər boyu Qurban bayramını böyük ehtiram və sevgi ilə qeyd edir. Ölkəmizdə bu bayram dövlət səviyyəsində keçirilir və rəsmi qeyri-iş günü elan olunur. Müstəqillik əldə edildikdən sonra qəbul edilən qanuna əsasən, Qurban bayramı Azərbaycanda rəsmi dini bayram kimi qeyd edilir.
Bayram günlərində Azərbaycanın bütün məscidlərində bayram namazları qılınır, xeyriyyə aksiyaları təşkil olunur, aztəminatlı ailələrə, şəhid ailələrinə və sosial müdafiəyə ehtiyacı olan insanlara yardımlar edilir. Bu isə Azərbaycan cəmiyyətində humanizm, mərhəmət və milli-mənəvi dəyərlərin nə qədər güclü olduğunu göstərir.
Qurban bayramı həm də ailə birliyinin və milli həmrəyliyin simvoludur. İnsanlar bu müqəddəs günlərdə bir araya gəlir, küsülülər barışır, böyüklərə hörmət, kiçiklərə qayğı göstərilir. Bayramın əsas mesajı insanları xeyirxahlığa, paylaşmağa və bir-birinə dəstək olmağa çağırmaqdır.
Bu müqəddəs bayram Azərbaycan cəmiyyətində dini tolerantlığın, milli-mənəvi dəyərlərin və birlik ənənələrinin qorunub yaşadılmasının mühüm nümunələrindən biri hesab olunur. Qurban bayramı insanlara həm mənəvi rahatlıq gətirir, həm də cəmiyyətdə qarşılıqlı sevgi və mərhəmət hisslərini daha da gücləndirir.
