İsveç Ukraynaya bir neçə “Gripen” qırıcı təyyarəsi hədiyyə edir.
"Cebheinfo.az" xəbər verir ki, bu qərarı İsveçin Baş naziri Ulf Kristersson bu gün Uppland Hava Bazasında açıqlayıb.
Eyni zamanda, daha yeni “Gripen E” modellərinin gələcəkdə satışına dair danışıqlar Ukrayna Prezidenti Volodimir Zelenskinin bu gün İsveçə baş tutacaq rəsmi səfəri zamanı aparılacaq.
İsveç hökumətinin məlumatına görə, görüş zamanı aviasiya sahəsinə dair yeni xəbərlər açıqlanacaq.
Qeyd olunur ki, bu satışın Avropa İttifaqının 90 milyard avroluq kredit paketi hesabına maliyyələşdirilməsi planlaşdırılır.
Kristersson və Zelenski ötən il İsveçin Ukraynaya 150-yə qədər yeni Saab JAS 39 “Gripen E” modelinin satışını nəzərdə tutan niyyət məktubu imzalamışdılar.
Bu təyyarələr Ukrayna üçün prioritet hesab edilir. “Gripen” təyyarələrinin avtomobil yollarından və qısa uçuş-enmə zolaqlarından istifadə edə bilməsi, Rusiyanın Ukrayna aviabazalarına endirdiyi zərbələr fonunda onları xüsusilə vacib edir.
"Cebheinfo.az"
