Azərbaycanda dolların rəsmi məzənnəsi (USD/AZN) hazırda 1.70 MANAT səviyyəsində sabit saxlanılır.
Lakin beynəlxalq maliyyə qurumlarının proqnozlarına əsasən, orta və uzunmüddətli dövrdə (2027-ci ildən etibarən) dolların manat qarşısında yenidən bahalaşması gözlənilir.
Azpost.info bildirir ki, beynəlxalq reytinq agentliyi olan “Fitch Group”un araşdırma mərkəzi Fitch Solutions proqnozlaşdırır ki, manatın məzənnəsi 2027-ci ilə qədər sabit qalacaq, lakin növbəti illərdə devalvasiya təzyiqləri səbəbindən rəsmi məzənnə 2027-ci ildə 1.75 AZN-ə, 2028-ci ildən etibarən isə 1.80 AZN-ə yüksələ bilər.
Dolların gələcəkdə bahalaşa biləcəyinə işarə edən əsas amillər və risklərə tədiyə balansının və neft gəlirlərinin azalması aiddir. Çünki manatın sabitliyi birbaşa ölkəyə daxil olan neft-qaz dollarından asılıdır.
İqtisadçıların təhlillərinə görə, cari əməliyyatlar hesabının profisiti və neft gəlirləri azaldıqca manat üzərindəki basqı kəskin şəkildə artır.
Azərbaycanda idarə olunan (sabit) məzənnə rejimi tətbiq edilir. Dolların bahalaşması bazardakı təbii tələb-təklifdən daha çox Azərbaycan Mərkəzi Bankının qəbul edəcəyi inzibati qərarlardan asılıdır.
ABŞ iqtisadiyyatının vəziyyəti və inflyasiya göstəriciləri fonunda dolların dünya birjalarında aparıcı valyutalara qarşı güclənməsi daxili bazara da dolayı psixoloji təsir göstərir.
