7 iyunda Ermənistanda keçiriləcək parlament seçkiləri ərəfəsində ABŞ Prezidenti Donald Tramp Ermənistanın Baş naziri Nikol Paşinyana açıq şəkildə dəstəyini ifadə edib.
“European Pravda”nın məlumatına görə, Tramp bunu sosial media platforması TruthSocial-da yazıb.
ABŞ Prezidenti Paşinyanı gözəl dost və lider adlandırıb və onun sözlərinə görə, “ölkəsini güclü, çiçəklənən və tamamilə təhlükəsiz edir”.
“Nikol Ermənistan və bütün Cənubi Qafqaz regionu üçün sülh və çiçəklənmə ilə bağlı vizyonumu tam şəkildə bölüşür. Dövlət katibimiz Marko Rubio bu yaxınlarda Ermənistana səfər edib və orada hər iki ölkəmiz üçün bir neçə vacib müqavilə imzalayıb”, - ABŞ Prezidenti yazıb.
Ağ Ev rəhbəri əlavə edib ki, tezliklə ABŞ və Ermənistan Cənubi Qafqazı dəyişdirəcək və Amerika enerji şirkətlərinin regiona çıxış əldə etməsinə kömək edəcək “Trampın Beynəlxalq Sülh və Çiçəklənməyə Doğru Yolu”nu birgə həyata keçirməyə başlayacaqlar.
“Bu səbəblərə görə, Nikolun 7 iyun 2026-cı ildə yenidən seçilməsini tam və qeyd-şərtsiz dəstəkləyirəm. Nikolun köməyi ilə biz ABŞ-ı, Ermənistanı, Cənubi Qafqazı və Orta Asiyanı əvvəlkindən daha böyük zirvələrə qaldıracağıq”, - ABŞ prezidenti bildirib.
SAMİRƏ
