Ən özünə inamlı insanlar adətən istənilən uğursuzluqlarla mübarizə aparmaq üçün daxili gücü möhkəmləndirən vərdişlərə əməl edirlər.
Ölkə.az Qaynarinfo-ya istinadən xəbər verir ki, "YourTango" portalı bu cür insanların özünə inam qazanmalarına və ətrafdakılardan daha güclü olmalarına kömək edən 8 vərdiş barədə məlumat verib.
1. Onlar kiçik qələbələri izləyirlər
Çox vaxt biz əldə etdiyimiz xırda nailiyyətləri görməzdən gəlir və yalnız çatışmazlıqlarımıza fokuslanırıq. Halbuki kiçik qələbələrə diqqət yetirmək insana inkişaf etməyə kömək edir, özünə hörmət hissini artırır və öz dəyərlərinə uyğun davrandığı anları görməyə imkan verir.
2. Onlar narahatlıq hissini qəbul etməyi öyrənirlər
Narahatlıq xoş hiss deyil, buna görə ondan qaçmaq təbii görünə bilər. Lakin onu qəbul etməyi bacarmaq insanı inkişaf etdirir. Sizi narahat edən şeyi dərhal aradan qaldırmağa çalışmadan onu emal etməyi öyrənmək vacibdir.
Psixoloq Muirean Ayriş qeyd edir ki, diskomfortun qəbul edilməsi beynin strukturunu dəyişə və insanı daha az impulsiv edə bilər. Bu isə çətin vəziyyətlərdə daha düşünülmüş qərarlar verməyə kömək edir.
3. Onlar kiçik gündəlik öhdəliklər götürürlər
Bəzən insanlar qarşılarına böyük və çətin görünən məqsədlər qoyur və nəticədə heç başlamadan imtina edirlər. Kiçik və real hədəflər isə uğur qazanmaq üçün daha sağlam zəmin yaradır.
4. Onlar özünü məhv edən davranış modellərini tanıyırlar
Bəzən insanlar öz dəyərlərini və ehtiyaclarını arxa plana keçirir, özünü sabotaj edir və ya başqalarını özlərindən üstün tutur. Terapevt Nensi Karbone qeyd edir ki, başqalarının həyatınızı idarə etməsinə imkan vermək yox, öz seçimlərinizə sahib çıxmaq vacibdir.
5. Onlar keçmiş uğurlara qayıdırlar
Əvvəlki çətinliklərin öhdəsindən gəldiyinizi xatırlamaq gələcək problemlərlə mübarizədə güc verir. Bu, özünüzə güvənməyi və düzgün qərarlar verə bilmə qabiliyyətinizi xatırladır.
6. Onlar bədənlərinə qulaq asırlar
Ürək döyüntüsünün sürətlənməsi və ya mədə bulanması kimi əlamətlər emosional vəziyyətiniz barədə siqnallardır. Bu siqnalları anlamaq və onlara diqqət yetirmək çox faydalıdır.
7. Onlar qərarlarını özünü qınamadan yenidən nəzərdən keçirirlər
Həyat özünüzə düşmən kimi yanaşmadığınız zaman daha asan olur. Keçmiş səhvlərə görə özünüzü günahlandırmaq əvəzinə, niyə belə etdiyinizi və bundan nə öyrəndiyinizi analiz etmək daha faydalıdır.
8. Onlar öz dəyərini təsdiqləməyi öyrənirlər
Bu, öz hisslərini qəbul etmək və onları xarici təsdiq olmadan emal etmək deməkdir. Bu vərdiş insanı daha müstəqil edir və başqalarının fikirlərindən asılılığı azaldır.
