BAKI,TurkicWorld,Yusif Şərifzadə
Qəzza zolağında davam edən hərbi əməliyyatlar nəticəsində insan itkilərinin artdığı bildirilir.
TurkicWorld xəbər verir ki, Qəzza Səhiyyə Nazirliyi bölgədəki insan itkiləri ilə bağlı yenilənmiş statistikanı açıqlayıb.
Nazirliyin məlumatına görə, İsrailin hərbi əməliyyatları nəticəsində ölənlərin ümumi sayı 72 938 nəfərə, yaralananların sayı isə 172 919 nəfərə çatıb.
Son hesabata əsasən, ötən 24 saat ərzində xəstəxanalara 7 nəfərin cəsədi gətirilib. Onlardan 6 nəfərinin son hücumlar zamanı həlak olduğu, 1 nəfərin isə əvvəlki yaralanmalar nəticəsində həyatını itirdiyi bildirilib.
Eyni müddətdə daha 25 yaralının xəstəxanalara çatdırıldığı qeyd olunub.
Nazirlik həmçinin oktyabrın 11-də elan edilmiş atəşkəsdən sonrakı dövrə dair məlumatları da açıqlayıb. Bildirilib ki, həmin tarixdən bəri 929 nəfər həlak olub, 2 811 nəfər yaralanıb.
Bundan əlavə, dağıntılar altından 781 nəfərin cəsədinin çıxarıldığı qeyd edilib.
Qurumun açıqlamasına görə, dağıntılar altında qalan şəxslərin axtarışı davam edir. Xüsusilə əvvəllər girişin mümkün olmadığı ərazilərdə axtarış-xilasetmə əməliyyatları genişləndirilib.
Humanitar təşkilatlar və beynəlxalq qurumlar Qəzzada mülki əhalinin vəziyyətinin ağır olaraq qaldığını bildirir və bölgəyə yardım çatdırılmasının sürətləndirilməsinə çağırırlar.
