Bu günlərdə Türkiyə Ticarət Nazirliyinin İxrac Baş İdarəsinin Elektron İxrac, Davranış İctimai Siyasətləri və Yeni Nəsil Texnologiyaları Rəqəmsal Marketinq Departamentinin rəhbəri Həsən Önal ölkənin internet ixracının inkişafı barədə mühüm məlumatlar açıqlayıb.
Bizim.Media xəbər verir ki, o, Azərbaycanın türk şirkətləri üçün aparıcı hədəf bazarlarından biri olduğunu vurğulayıb.
"Şirkətlərimiz üçün əsas hədəf bazarı ABŞ olaraq qalır. Ondan sonra Səudiyyə Ərəbistanı, Azərbaycan və Almaniya gəlir", — deyə H.Önal bildirib.
Onun sözlərinə görə, türk şirkətləri qlobal bazarlara əsasən beynəlxalq onlayn ticarət platformaları (marketpleys) vasitəsilə daxil olurlar.
Bunun üçün Türkiyə internet ixracına dəstək proqramları hazırlayır, biznesə iri ticarət platformalarında fəaliyyət göstərməyə kömək edir və artıq 27 marketpleys üzrə bələdçi təlimatları hazırlayıb.
Qlobal ticarətdəki dəyişikliklər və bir sıra dövlətlərdə gömrük güzəştlərinin ləğvi səbəbindən Türkiyə internet ixracı üçün hədəf bazarların siyahısını 18-dən 35-ə çatdırıb. Yeni siyahıya Almaniya, Fransa və Rumıniya kimi ölkələr də əlavə edilib. Nazirliyin məlumatına görə, son illərdə Türkiyənin elektron ixrac həcmi 2 milyard dollardan 6,4 milyard dollara yüksəlib.
Yerli bazar üçün daxili stimul və tərəfdaşlıq imkanları
Türkiyənin onlayn satışlarının artması Azərbaycan bazarında geyim, kosmetika, ev və uşaq məhsulları, aksesuarlar kimi kateqoriyalarda çeşidləri artırır. Bu rəqabət yerli satıcıları öz rəqəmsal kanallarını inkişaf etdirməyə məcbur edir: məhsulun ətraflı təsviri, rahat ödəniş, geri qaytarma şərtləri, keyfiyyətli qablaşdırma və operativ müştəri xidmətləri artıq bir zərurətdir.
Digər tərəfdən, bu artım yerli loqistika, kuryer xidmətləri, anbar təsərrüfatı, ödəniş həlləri və marketinq sahəsinə böyük imkanlar açır. Azərbaycan şirkətləri türk satıcılarının yerli tərəfdaşına çevrilərək malların saxlanması, çatdırılması və adaptasiyasını öz üzərinə götürə bilərlər.
Müstəqil şəkildə beynəlxalq bazara çıxa bilməyən kiçik və orta biznes subyektləri bu hazır sistemə inteqrasiya edərək təcrübə və müştəri bazası qazanmaq şansı əldə edirlər.
Ticarətdə növbəti mərhələ: Süni intellekt və analitika
Türkiyə Ticarət Nazirliyi şirkətlərin xarici bazarlar barədə dəqiq məlumat alması üçün süni intellekt əsaslı platformalar hazırlayır. Bu isə Azərbaycan biznesi üçün analitika, beynəlxalq ödənişlər və rəqəmsal reklam alətlərinin rolunu artırır.
Daha geniş müstəvidə bu maraq iki ölkə arasındakı iqtisadi əlaqələri yeni formata keçirir: ənənəvi topdansatış və mağaza formatı onlayn platformalar və rəqəmsal loqistika ilə tamamlanır. İndi əsas şərt təkcə tədarükün həcmi deyil, həm də sürət, xidmət keyfiyyəti və rəqəmsal mühitdə istehlakçı ilə işləmək bacarığıdır.
Türkiyə bu istiqamətdə növbəti addımlarını planlaşdırır; sentyabrın ilk həftəsində İstanbulda onlarla qlobal marketpleysin iştirakı ilə "Istanbul Global E-Export Summit" keçiriləcək. İnternet ixracı sahəsində prioritet bazar olan Azərbaycan üçün isə bu proses həm zəngin məhsul çeşidi, həm də Bakı ilə Ankara arasında sürətlə böyüyən onlayn satış bazarı vasitəsilə iqtisadi bağların daha da güclənməsi deməkdir. (Mənbə: Day.az)
Bizim.Media
